कामगारावर कोयत्याने हल्ला

पिंपरी, ता. १८ : कंपनीत काम करत असताना किरकोळ कारणावरून कामगारांमध्ये वाद झाला. त्यामध्ये एकाने दुसऱ्यावर कोयत्याने हल्ला केला. ही घटना चिंचवडमधील शिव महिंद्रा कंपनी येथे घडली.
या प्रकरणी सोहेल चुन्ना खान (रा. गंगानगर, आकुर्डी) यांनी निगडी पोलिस ठाण्यात फिर्याद दिली आहे. त्यानुसार पोलिसांनी सूरज सरोदे (वय २५), प्रतीक उबाळे (वय २३), अंशु रोकडे (वय २२) आणि प्रथमेश (वय २५, सर्व रा. घरकुल, चिखली) यांच्यावर गुन्हा दाखल केला आहे. फिर्यादी आणि आरोपी एकाच कंपनीत काम करतात.
खंडित वीजपुरवठा सुरळीत झाल्यावर कंपनीतील कॉम्प्रेसर चालू करतेवेळी वाद झाला. त्यावेळी आरोपीने इतर साथीदारांना बोलावून घेतले आणि त्यांनी फिर्यादीला हाताने मारहाण केली. भांडणे सोडवण्यासाठी फिर्यादीचे मित्र गाझी शेख आणि चांद शेख आले असता आरोपी प्रथमेशने सोबत आणलेल्या कोयत्याने हातावर मारून जखमी केले. तसेच फिर्यादीला जिवे मारण्याची धमकी दिली.