चिखलीमध्ये खंडित वीजपुरवठ्याने नाकीनऊ

चिखली, ता. ८ : चिखली परिसरात दररोज विजेचा लपंडाव सुरू असून व्यावसायिक आणि उद्योजकांना त्याचा मोठा फटका बसत आहे. या प्रकारामुळे नागरिकही त्रस्त झाले आहेत.
चिखली परिसरातील मोरे वस्ती, चिखली गावठाण, नेवाळे वस्ती, मेहेत्रे वस्ती तसेच कुदळवाडी परिसरात दररोज नित्यनेमाने वीज पुरवठा खंडित होत आहे. मोरे वस्ती परिसरात एकदा वीज पुरवठा खंडित झाल्यानंतर तो सुरळीत करण्यासाठी अनेक तास लागत आहेत. आठवड्यातील गुरुवार हा दिवस देखभाल आणि दुरुस्तीसाठी राखीव ठेवण्यात आलेला आहे. दर आठवड्याला देखभाल दुरुस्ती केली जात असतानाही इतर दिवशी वीजपुरवठा खंडित होण्याचे प्रमाण कमी झालेले नाही. वीज पुरवठ्याच्या देखभाल दुरुस्तीसाठी कोट्यवधींच्या निविदा काढल्या जातात. मग, वीज पुरवठा खंडित का होतो ? असा प्रश्न नागरिकांकडून उपस्थित केला जात आहे.
चिखली परिसरात मोठ्या प्रमाणात लघुउद्योग असून विजेच्या लपंडावाचा मोठा आर्थिक फटका उद्योजकांना बसत आहे. त्याचबरोबर रात्री सात ते नऊ या दरम्यान वीज पुरवठा खंडित होण्याचे प्रमाण अधिक आहे. त्यामुळे ग्राहक येण्याच्या वेळेतच वीज पुरवठा खंडित झाल्याने छोटे-मोठे दुकानदार आणि व्यावसायिकांना त्याचा त्रास सहन करावा लागत आहे.

अनधिकृत बांधकामे कारणीभूत ?
चिखली परिसरात मोठ्या प्रमाणात अनधिकृत बांधकामे सुरू असून रस्त्याच्या कडेला मोठ्या प्रमाणात खोदाई केली जाते. अधिकृतपणे केलेल्या खोदाईमुळे ही केबल तुटण्याचे प्रमाण वाढत असून परिणामी वीज पुरवठा खंडित होत असल्याचे काही नागरिकांचे म्हणणे आहे.

वीज पुरवठा सुरळीत राहण्यासाठी उन्हाळ्यामध्ये मोठ्या प्रमाणात दुरुस्तीची कामे केली गेली. तसेच आजही मोठ्या प्रमाणात दुरुस्तीची कामे सुरूच आहेत. मात्र, वीज पुरवठ्याची कामे योग्य रीतीने होत नसल्याने तसेच जेथे गरज आहे त्या ठिकाणी केबल उपलब्ध करून दिल्या जात नसल्याने आजही वारंवार वीज पुरवठा खंडित होत आहे.
- विजय जरे, सामाजिक कार्यकर्ते

खंडित वीजपुरवठ्याबाबत माहिती घेऊन संबंधित अधिकाऱ्यांना सूचना देऊन तो सुरळीत करण्यात येईल. नेवाळे वस्ती येथे एक स्विचिंग स्टेशन करण्याबाबत प्रस्ताव पाठवण्यात आला असून एका भागाची वीज गेल्यास दुसऱ्या भागाकडून ती जोडता येईल. त्याने चिखली परिसराचा विद्युत पुरवठा खंडित होणार नाही.
- अतुल देवकर, कार्यकारी अभियंता, भोसरी विभाग, महावितरण