डॉ. हेडगेवार क्रीडा संकुलामुळे खेळाडूंना पर्वणी

राहुल हातोले : सकाळ वृत्तसेवा
पिंपरी, ता. १५ : शहरातील अजमेरा सोसायटी परिसरातील मासुळकर कॉलनीत डॉ. केशव बळिराम हेडगेवार मैदान आणि क्रीडा संकुल स्थापन करण्यात आले आहे. तेथे फुटबॉल मैदान, स्केटिंग ग्राउंड, व्यायामशाळा, बॅडमिंटन हॉल उपलब्ध आहेत. याला खेळाडूंचा चांगला प्रतिसाद मिळत आहे. दर्जेदार स्केटिंग ग्राउंडमुळे खेळाडूंसाठी हे मैदान पर्वणी ठरत आहे. रोलबॉलचे आंतरराष्ट्रीय खेळाडूही संकुलाकडे आकर्षित होत आहेत. शहरात महापालिकेची एकूण ३१ मैदाने आहेत. यापैकी शहराच्या मध्यभागी हे क्रीडा संकुल आहे.

प्रमुख सुविधा : फुटबॉल ग्राउंड, स्केटिंग ट्रॅक, व्यायामशाळा (जिम), बॅडमिंटन हॉल.

आंतरराष्ट्रीय स्तरावरील सराव
नैरोबी येथे आंतरराष्ट्रीय रोलबॉल स्पर्धा नुकतीच पार पडली. त्याच्या सरावासाठी या मैदानाची निवड करण्यात आली होती. मैदानाचा पृष्ठभाग, रचना आणि जागेची व्यापकता सरावासाठी अत्यंत योग्य असल्याचे खेळाडूंनी सांगितले.

स्थानिक खेळाडूंचा प्रतिसाद
पिंपरी-चिंचवड परिसरातील अनेक खेळाडू सरावासाठी येतात
स्केटिंग ग्राउंडच्या दर्जामुळे लहान व तरुण खेळाडूंना प्रेरणा
व्यायामशाळा आणि बॅडमिंटन हॉलमुळे खेळाडूंच्या सर्वांगीण विकासाला मदत
प्रशिक्षणासाठी उपयुक्त वातावरण
शांत व खेळाभिमुख वातावरणामुळे सरावासाठी आदर्श

महापालिकेच्या क्रीडा सुविधा
शहरातील एकूण मैदाने : ३१
बॅडमिंटन हॉलची संख्या : १६
लॉन टेनिस कोर्ट : १२
इनडोअर कबड्डी मैदान : १

डॉ. हेडगेवार संकुलाची वैशिष्ट्ये
हे क्रीडा संकुल पिंपरीच्या मध्यभागी असल्यामुळे खेळाडूंना संकुल गाठणे सोपे जाते. नियमितपणे केली जाणारी देखभाल आणि मैदानाची सुधारणा खेळाडूंच्या गरजेनुसार सुविधा अद्ययावत ठेवण्यात येतात.

भविष्यातील योजना आणि अपेक्षा
- स्थानिक खेळाडू व पालकांनी महापालिकेकडे जास्त स्पर्धा आयोजन, प्रशिक्षकांची नियुक्ती आणि अधिक खेळांसाठी सुविधा वाढविण्याची मागणी केली आहे.
- या संकुलाचा स्पोर्ट्स हब म्हणून विकास करणे ही शहराच्या क्रीडा धोरणासाठी उपयुक्त ठरू शकते.

डॉ. हेडगेवार क्रीडा संकुल केवळ पिंपरीतील नव्हे; तर शहरातील खेळाडूंना सुवर्णसंधी देणारे केंद्र ठरत आहे. येथील अद्ययावत सुविधा, जागेचा उपयोग आणि खेळांसाठी अनुकूल वातावरण यामुळे हे संकुल खऱ्या अर्थाने एक ‘क्रीडा पर्वणी’ ठरत आहे.
- पंकज पाटील, उपायुक्त, क्रीडा विभाग, महापालिका.

PNE25V31607