बसचालकांना ‘आयडीटीआर’मध्ये प्रशिक्षण

पिंपरी, ता. ७ : पुणे महानगर परिवहन महामंडळाच्या (पीएमपीएमएल) चालकांच्‍या दोन दिवसांचे विशेष प्रशिक्षण नाशिक फाटा, पिंपरी येथील ड्रायव्हिंग प्रशिक्षण आणि संशोधन संस्थेत (आयडीटीआर) देण्यास सुरुवात करण्यात आली. प्रशासनाने स्वमालकीच्या आणि ठेकेदारांच्या चालकांना हे प्रशिक्षण दिले जाणार आहे. सध्या पन्नास चालकांच्या पहिल्या तुकडीच्या प्रशिक्षणाला सुरुवात करण्यात आली. बसच्‍या वाढत्‍या अपघाताला रोखण्यासाठी या विशेष प्रशिक्षणाचे आयोजन करण्यात आले आहे.
पीएमपीएमएलकडून पुणे, पिंपरी-चिंचवडबरोबरच ग्रामीण भागात ‘पीएमआरडीए’च्या हद्दीत देखील प्रवाशांना सेवा दिली जाते. यातून दररोज सरासरी दहा लाखांपेक्षा अधिक प्रवासी प्रवास करतात. पीएमपीएलच्या ताफ्यामध्ये स्वमालकीच्या आणि ठेकेदारांच्या बसचा समावेश आहे. अनेकदा या चालकांकडून सिग्नलच्‍या नियमांचे उल्‍लंघन करणे, वेगाने बस चालवणे, मोबाइल फोनचा वापर करणे आदीसह विविध वाहतूक नियमांचे उल्लंघन केल्याच्या घटना घडत आहेत. परिणामी अपघाताला देखील सामोरे जावे लागत आहे. मुंबईमधील कुर्ला येथे बस अपघातानंतर पीएमपीएलने खबरदारी घेण्यास सुरुवात केली. चालकांना विशेष प्रशिक्षण देण्याचा निर्णय प्रशासनाने घेतला आहे. नाशिक फाटा येथील केंद्रीय रस्ते वाहतूक संस्था (सीआयआरटी) संलग्न आयडीटीआर संस्थेमार्फत दोन दिवसांचे विशेष प्रशिक्षण दिले जाणार आहे.

असे असणार प्रशिक्षण
- सहा जानेवारी ते एक फेब्रुवारी दरम्यान १५ तुकड्यांच्या ७५० चालकांना प्रशिक्षण दिले जाणार
- एका बॅचमध्ये ३० ठेकेदारांच्या आणि २० स्वमालकीच्या चालकांचा समावेश
- दररोज सकाळी नऊ ते सायंकाळी साडे पाचपर्यंत आठ सत्रांत प्रशिक्षण दिले जाणार
- रस्‍ता सुरक्षा, मोटार वाहन काद्यातील तरतुदी, वाहतूक नियमांचे उल्लंघन प्रकरणी कारवाईच्या तरतुदी, सीएनजी आणि इलेक्ट्रीक बसचे परिचलन, तणाव व्यवस्थापनावर मार्गदर्शन
- मनःशांती, योग आणि व्यायाम, अपघातानंतर प्रथमोपचार यांसह तांत्रिक बाबींचे प्रशिक्षण दिले जाणार