विविध उद्योग-कंपन्यांत खंडेनवमी उत्साहात

पिंपरी, ता. १ ः पिंपरी चिंचवड शहरातील टाटा मोटर्स, सिमंड्स मार्शल आणि एसकेएफ कंपन्यांमध्ये खंडेनवमी उत्साहात साजरी करण्यात आली. सर्व विभागात यंत्रांची पारंपरिक पद्धतीने पूजा करण्यात आली. टाटा मोटर्स कंपनीत सकाळी साडेआठ ते सायंकाळी सहा वाजेपर्यंत पूजा चालली.
खंडेनवमीनिमित्त कामगार वर्गात मोठा उत्साह होता. कंपन्यांच्या प्रत्येक विभागांत सकाळी आठ वाजल्यापासून यंत्रपूजनाची तयारी सुरू करण्यात आली. सर्व विभागांतील आपापल्या कार्यस्थळी सुंदर सजावट केली. फुलांचे तोरण, रंगीबेरंगी रांगोळ्या, आकर्षक विद्युत दिव्यांची रोषणाई यामुळे संपूर्ण परिसरात मंगलमय वातावरण निर्माण झाले. पूजेच्यावेळी मंगल वाद्यांच्या गजराने आणि मंत्रोच्चारांनी संपूर्ण परिसर भक्तिभावाने दुमदुमून गेला. पूजेसाठी कामगार, कर्मचारी, अधिकारी पारंपारिक वेशभूषेत आले.
टाटा मोटर्स कंपनीत सकाळी साडेआठ वाजता पूजेला सुरुवात झाली. यावेळी सीएचआरओ अंजली पैस, सीताराम गांधी, विशाल बादसे, प्रकल्प प्रमुख नीरज अगरवाल, अनुराग छारिया, टाटा मोटर्स एम्प्लॉईज युनियनचे अध्यक्ष व शिशुपालसिंग तोमर, सरचिटणीस अजित पायगुडे आदी उपस्थित होते.
सिमंड्स मार्शल कंपनीत देखील सकाळी उत्साहात पूजेला सुरुवात झाली. या पूजेस मार्शल कामगार संघटनेचे अध्यक्ष लक्ष्मीकांत भोर, उपाध्यक्ष आशुतोष शिंदे, सचिव सचिन जाधव यांनी उपस्थित राहून कामगारांना शुभेच्छा दिल्या. कंपनीचे अधिकारी नितीन दबडे, रुशाद गोकल, राजू पंडित, रवींद्र सोनगिरे, मच्छिंद्र ढवळे, सचिन वाळके आदी उपस्थित होते.
एसकेएफ कंपनीत सकाळी साडेआठ वाजता पूजेला सुरुवात करण्यात आली. यावेळी सरचिटणीस साजिद पठाण, एसकेएफ एम्प्लॉईज युनियनचे अध्यक्ष सुनील आवाळे, उपाध्यक्ष किशोर कदम, मनुष्यबळ व्यवस्थापक मंजुनाथ करिकट्टी आदी उपस्थित होते.