खंडित वीजपुरवठ्याने थेरगावातील नागरिक हैराण

पिंपरी, ता. ६ : ऐन सणासुदीच्या काळात थेरगाव परिसरातील नागरिकांना वीजपुरवठा खंडित झाल्याने त्रास सहन करावा लागत आहे. दसऱ्याच्या दिवशी तब्बल चार तास वीजपुरवठा बंद राहिल्याने नागरिक त्रस्त झाले. जुन्या वाहिन्यांवर ताण वाढल्याने ही समस्या निर्माण होत असून महावितरणकडून फक्त तात्पुरती दुरुस्ती केली जात असल्याचा आरोप स्थानिकांनी केला आहे.
थेरगाव, रावेत, किवळे, चिंचवड, निगडी या भागांत गेल्या काही वर्षांत बांधकामांची संख्या वाढली आहे. बैठी घरे पाडून नव्या उंच इमारती उभारल्या जात आहेत. तसेच जुन्या सोसायट्यांमध्येही नव्याने बांधकाम सुरू असल्याने विजेची मागणी मोठ्या प्रमाणात वाढली आहे. मात्र, अनेक ठिकाणी जुन्या वाहिन्यांमुळे विजेचा दाब कमी होतो आणि वारंवार वीजपुरवठा खंडित होतो. नागरिकांनी वारंवार तक्रारी करूनही महावितरणकडून ठोस उपाययोजना केली जात नसल्याचे दिसून आले आहे. काही ठिकाणी महावितरण कार्यालयांचे संपर्क क्रमांक बंद असतात. त्यामुळे नागरिकांना अडचणींचा सामना करावा लागतो. सणासुदीच्या काळात वारंवार खंडित होणाऱ्या वीजपुरवठ्यामुळे नागरिकांमध्ये संताप व्यक्त केला जात आहे.

वारंवार वीज पुरवठा खंडित होत आहे. याबाबत आम्‍ही विचारणा केल्‍यावर योग्य उत्तरे दिली जात नाहीत. वीज पुरवठा सुरळीत होईल असे सांगितले जाते. मात्र, होत नाही.
- संतोष जाधव, नागरिक