‘रमजान ईद’च्या पार्श्वभूमीवर पिंपरी बाजारपेठ गजबजली

रमजान ईदनिमित्त रेलचेल
कपडे, खाद्यपदार्थ, वस्तू खरेदीसाठी उशिरापर्यंत झुंबड

सकाळ वृत्तसेवा
पिंपरी, ता. ३० : शहरात सोमवारी (ता.३१) रमजान ईद मोठ्या उत्साहात साजरी होत आहे. या पार्श्वभूमीवर रविवारी (ता.३०) पिंपरी, चिंचवडसह उपनगरांतील बाजारपेठा गजबजलेल्या दिसल्या. प्रामुख्याने मिठाई, खाद्यपदार्थ, सुकामेवा, कपडे, पादत्राणे, घरगुती साहित्य, शोभेच्या वस्तू आणि अन्य साहित्य खरेदीसाठी गर्दी दिसून आली.
महिनाभर केलेला ‘रोजा’ अर्थात उपवास ईदच्या दिवशी सोडण्यात येतो. ईदच्या दिवशी लहान मुलांपासून मोठ्यांपर्यंत सर्वजण नवीन कपडे परिधान करतात. पुरुषमंडळी कुर्ता, पठाणी परिधान करतात. शहरातील पिंपरी कॅम्प, भोसरी, काळेवाडी, चिंचवड या प्रमुख बाजारपेठांत कपडे खरेदीसाठी पूर्वसंध्येला लगबग दिसून आली. बाजारात पाचशे रुपयांपासून ते दोन हजार रुपयांपर्यंत कुर्ता, पठाणी विक्रीसाठी उपलब्ध होते. लहान मुलांसाठी आणि महिलांसाठी रेडिमेड ड्रेस विक्रीसाठी उपलब्ध होते. लहान मुलांच्या कापड्यांमध्येही विविध डिझाइन उपलब्ध होते. लहान मुलांचे कपडे चारशे रुपयांपासून ते चार ते पाच हजार रुपयांपर्यंत उपलब्ध होते.