वबांधकाम व्‍यावसायिकांना ‘पीएमआरडीए’चा इशारा

पिंपरी, ता. २८ : माण, मारुंजी आणि वाघोली परिसरातील सोसायट्यांकडून आलेल्या तक्रारींनंतर पुणे महानगर प्रदेश विकास प्राधिकरण (पीएमआरडीए) ‘ॲक्‍शन मोड’वर आले आहे. नागरिकांना रस्‍ता उपलब्ध करून देणे, सांडपाणी निचरा आदींसह विविध समस्‍या सोडवाव्यात, अन्‍यथा कारवाईचा करण्यात येईल असा इशारा बांधकाम व्‍यावसायिकांना देण्यात आला.
काही बांधकाम व्यावसायिकांनी रखडलेले रस्‍ते करण्याबाबत आराखडा दिला असून त्‍यावर मंजुरीची प्रक्रिया सुरू असल्याची माहिती विकास परवानगी विभागाने दिली. मुळशी, मावळ, चाकण आणि वेल्हा परिसरात गेल्या काही वर्षांत मोठ्या प्रमाणावर निवासी प्रकल्प उभे राहिले आहेत. रहिवाशांच्या ताब्यात सोसायट्या आल्यानंतर रस्ते, पाणीपुरवठा, सांडपाणी व्यवस्थापन, वाहनतळ आणि सार्वजनिक सुविधांकडे सर्रास दुर्लक्ष केले गेले आहे. याबाबत ‘पीएमआरडीए’कडे सतत तक्रारी येत आहेत. या सर्व तक्रारींवर तातडीने कारवाई करण्यासाठी ‘पीएमआरडीए’ने विशेष मोहीम हाती घेतली आहे. काही बांधकाम व्‍यावसायिकांना नागरिकांच्‍या तक्रारीवरून नोटिसा बजाविण्यात आल्‍या आहेत.
---
नागरिकांच्‍या तक्रारीनंतर बांधकाम व्‍यावसायिकांना नोटिसा बजावल्या होत्‍या. त्‍यानुसार काही जणांनी रस्‍ता बनविण्याचा आराखडा सादर केला आहे. त्‍यावर विभागामार्फत प्रक्रिया सुरू आहे. नागरिकांच्‍या प्राप्‍त तक्रारींवर कार्यवाही केली जाईल.
- अविनाश पाटील, संचालक, विकास परवानगी विभाग, ‘पीएमआरडीए’
-----