लाचखोर पोलिस उपनिरीक्षक निलंबित

पिंपरी, ता. ४ : पिंपरी चिंचवड पोलिस आयुक्तालयातील आर्थिक गुन्हे शाखेतील लाचखोर पोलिस उपनिरीक्षकाचे निलंबन करण्यात आले आहे. एका प्रकरणात ४६ लाख ५० हजारांची लाच घेताना लाचलुचपत प्रतिबंधक विभागाने (एसीबी) त्याला रास्ता पेठ परिसरात पकडले होते.
प्रमोद रवींद्र चिंतामणी (रा. गंगोत्री पार्क, दिघी रोड, भोसरी, मूळ - कर्जुले हरियाळ, ता. पारनेर, जि. अहिल्यानगर) असे लाचखोर उपनिरीक्षकाचे नाव आहे. तर, या प्रकरणात नाव आलेल्या वरिष्ठ पोलिस निरीक्षक संदीप सावंत यांची बदली नियंत्रण कक्षात बदली करण्यात आली आहे. पोलिस आयुक्त विनयकुमार चौबे यांनी याबाबत आदेश दिले आहेत. पिंपरी चिंचवड पोलिसांकडे असलेल्या एका फसवणूक प्रकरणाचा तपास प्रमोद चिंतामणी याच्याकडे होता. या प्रकरणात त्याने दोन कोटींची मागणी केली होती. त्यातील एक कोटी तो वरिष्ठ पोलिस निरीक्षकाच्या नावे मागत होता.