वॉशिंग सेंटरचे पाणी मुंडे चौकात रस्त्यावर

सकाळ वृत्तसेवा
पिंपरी, ता. १० ः गोपीनाथ मुंडे चौकालगत असलेल्या एका खाजगी वॉशिंग सेंटरवरमधील पाणी थेट निगडी-तळवडे रस्त्यावर येत आहे. त्यामुळे चौकात बरेच पाणी साचलेले असते. दुचाकी घसरून अनेकदा अपघात होतात. या वॉशिंग सेंटरला महापालिका प्रशासनाने केवळ नोटिसा बजावल्या आहेत, मात्र प्रत्यक्षात कोणतीही कारवाई होत नाही. महापालिकेने काही महिन्यांपूर्वी निगडी ते गोपीनाथ मुंडे चौकापर्यंत करोडो रुपये खर्च करून प्रशस्त पदपथ आणि सायकल ट्रॅक विकसित केला आहे. चौकात बाराही महिने पाणी असते. त्यामुळे नागरिकांना पाण्यातून रस्ता ओलांडताना तारेवरची कसरत करावी लागते. पदपथावरून जाणाऱ्या नागरिकांच्या अंगावर पाणी उडते. महापालिका प्रशासनाने हा प्रकार थांबवावा, अशी नागरिकांची मागणी आहे.
----------