चोरी, हरवलेले मोबाईल नागरिकांना परत

पुणे, ता. २४ : चोरी अथवा हरवलेले मोबाईल परत मिळेल, अशी फारशी अपेक्षा नसते; परंतु या घटनेत पोलिसांत तक्रार केल्यास तो परत मिळतोच, असा ठाम विश्वास वारजे परिसरातील नागरिकांना ‘हस्तगत मोबाईल वितरण’ उपक्रमातून मिळाला आहे.

वारजे-माळवाडी पोलिस ठाणे हद्दीत गेल्या काही महिन्यांपासून चोरी व हरविलेल्या मोबाईलच्या तक्रारी वाढल्या होत्या. या तक्रारींवर वारजे पोलिस ठाण्याने तातडीने लक्ष देत तांत्रिक तपासाच्या आधारे शोधमोहीम राबवली. त्याचा परिणाम म्हणून एकूण ६५ चोरी गेलेले आणि हरवलेले मोबाईल पोलिसांनी शोधून काढले असून, ते ‘हस्तगत मोबाईल वितरण’ कार्यक्रमाच्या माध्यमातून त्यांच्या मालकांना परत करण्यात आले.