विकास परवानगी, भोगवटा पत्र उद्यापासून ऑनलाइन

पिंपरी, ता. २४ : शासनाच्या अधिसूचित सेवा पारदर्शक पद्धतीने नागरिकांना पोहचवणे, तसेच वेळेत देण्यासाठी पुणे महानगर प्रदेश विकास प्राधिकरणाने (पीएमआरडीए) प्रणाली विकसित केली आहे. त्याद्वारे एकत्रिकृत विकास नियंत्रण व प्रोत्साहन नियमावली (यूडीसीपीआर) लागू असलेल्‍या क्षेत्रासह २०१८ ची नियमावली लागू असलेल्या उर्वरित क्षेत्रांत विकास परवानगी, जोते, भोगवटा व इतर परवाने देण्याची प्रक्रिया २६ फेब्रुवारीपासून ऑनलाइन सुरू केली जाणार आहे.
याबाबतची माहिती आयुक्त डॉ. योगेश म्हसे यांनी दिली. बांधकाम परवानगी प्रक्रियेचे ‘यूडीसीपीआर’नुसार प्रमाणन करण्यासाठी ‘बांधकाम परवानगी व्यवस्थापन प्रणाली’ पोर्टल राज्यात लागू करण्यात आले आहे. शासनाच्या सेवा नागरिकांना घरबसल्या ऑनलाइन देण्याच्या दृष्टीने ही अंमलबजावणी करण्यात येत आहे. अर्जदारांनी या ऑनलाइन प्रणालीत विकास परवानगीच्या आवश्यक कागदपत्रांसह प्रस्ताव ऑनलाइन दाखल करायचा आहे. या प्रणालीमार्फत प्रस्तावाची ऑनलाइन तपासणी होऊन विविध टप्प्यांवरील कार्यवाही पूर्ण केली जाणार आहे. त्यानंतर अर्जदाराने चलन भरल्यानंतर संबंधित प्रमाणपत्र ऑनलाइन दिले जाणार आहे. यामुळे नागरिकांना कार्यालयात येण्याची गरज राहणार नाही. संबंधितांना आपली फाइल मान्यतेच्या कुठल्या टप्प्यावर आहे, याची माहिती अर्जासोबत नमूद मोबाइल क्रमांकावर समजणार आहे.

प्रशासन करणार मार्गदर्शन
ऑनलाइन अर्ज करण्यास अडचणी आल्यास प्राधिकरणाच्या विकास परवानगी विभागाला भेट द्यावी. तेथे याबाबत नागरिकांना मार्गदर्शन करण्यात येणार आहे, अशी माहिती आयुक्त डॉ. म्हसे यांनी दिली.

अर्ज करण्यासाठी संकेतस्थळ
https://mahavastu.maharashtra.gov.in