भोसरी येथून बांगलादेशी घुसखोराला अटक

पिंपरी, ता. २५ : तीन वेगवेगळ्या नावांनी वास्तव्य करणाऱ्या आणखी एका बांगलादेशी घुसखोराला भोसरी पोलिसांनी अटक केली. ही कारवाई भोसरी-आळंदी रस्त्यावर बनाचा ओढ्याजवळ करण्यात आली.
नयन रतन सरकार (वय २१, रा. क्रिष्णापूर, लोहागारा, जि. नराईल, बांगलादेश, सध्या रा. लेबर कॅम्प, दिघी) असे या घुसखोराचे नाव
आहे. त्याच्याकडे राकेश रतन सरकार (रा. घोला नादिया, पश्चिम बंगाल) या नावाचे आधारकार्ड, तर सुमीत शंकर भक्ता (रा. नाकाशी पारा, पश्चिम बंगाल) नावाचे मतदान कार्ड आढळले आहे. याबाबत पोलिस उपनिरीक्षक श्रीकांत गुरव यांनी दिलेल्या माहितीनुसार, ‘‘आरोपीचे मूळ नाव नयन सरकार आहे. त्याच्याकडील शाळेचा दाखल, आधारकार्ड, मतदान कार्ड या कागदपत्रांवर त्याचाच फोटो असून नावे मात्र वेगळी आहेत.’’
दरम्यान, बनाचा ओढा येथे नाकाबंदीवेळी एक दुचाकीस्वार संशयितपणे जाताना पोलिसांना दिसला. चौकशीवेळी त्याच्या हालचाली आणि बोलणे संशयास्पद जाणवले. त्याच्या पिशवीत वेगवेगळ्या नावांची कागदपत्रे आढळली. त्यातून तो बांगलादेशी असल्याचे समोर आले. नयन हा वर्षभरापासून शहरात राहत असून बांधकाम मजुरी करायचा, असे पोलिसांनी सांगितले. त्याला न्यायालयाने २७ फेब्रुवारीपर्यंत पोलिस कोठडी सुनावली आहे.