विद्यार्थ्यांनी आत्मविश्वासाने वाटचाल करावी : शानभाग

पिंपरी, ता. २५ : ‘‘विद्यार्थ्यांनी व्यसनापासून दूर राहावे. मोबाइलचा अतिवापर टाळावा. योग्य मित्रांची निवड करावी. तसेच आई-वडिलांचा व ज्येष्ठांचा आदर राखण्याची गरज आहे. तसेच आत्मविश्वासाने वाटचाल करावी,’’ असे मार्गदर्शन एसपीएम हायस्कूलच्‍या मुख्याध्यापिका पल्लवी शानभाग यांनी विद्यार्थ्यांना केले.
यमुनानगर ज्येष्ठ नागरिक संघातर्फे इयत्ता दहावीतील गुणवंत विद्यार्थ्यांचा सत्कार करण्यात आला. अध्यक्षस्थानी ज्ञानप्रबोधिनी विद्यालयाच्या माजी मुख्याध्यापिका प्रज्ञा पाटील, प्रमुख पाहुणे गिरीश देशमुख यांची उपस्थिती होती.
ज्येष्ठ नागरिक संघाचे अध्यक्ष गजानन ढमाले यांनी प्रास्ताविक केले. यमुनानगर मधील सर्व शाळांतील प्रथम व द्वितीय क्रमांक मिळवणाऱ्या व संघ सदस्यांचे ७५ टक्के पेक्षा जास्त गुण मिळवणाऱ्या गुणवंत नातवांचे कौतुक व अभिनंदन करण्यात आले. पालकांसोबत फोटो काढून त्यांना भेटवस्तू देण्यात आली. जून महिन्यात ज्यांचे वाढदिवस आहेत अशा संघातील ज्येष्ठांचे वाढदिवस साजरे करण्यात आले.
विनिता श्रीखंडे यांनी सूत्रसंचालन केले. कार्यक्रमासाठी चंद्रकांत सुर्वे, विलास रसाळ, दत्तात्रय गुंजाळ, खवास खान, रमेश कावळे, नंदू सोनवणे, प्रदीप मुजुमदार, भाऊसाहेब म्हेत्रे व सर्व कार्यकारिणीने सहकार्य केले. मंगला पाटसकर यांनी आभार मानले