भगवद्गीता प्रज्ञा शोध परीक्षेत ३,५०० विद्यार्थ्यांचा सहभाग

भगवद्गीता प्रज्ञा शोध परीक्षेत ३,५०० विद्यार्थ्यांचा सहभाग

पिंपरी, ता. २५ : भगवद्गीता प्रज्ञा शोध परीक्षेत शहरातील ३५ शाळांच्या ३,५०० विद्यार्थ्यांनी सहभाग घेतला. यातील १४० गुणवंतांचा पारितोषिक वितरण सोहळा ग. दि. माडगुळकर नाट्यगृह, आकुर्डी, प्राधिकरण येथे पार पडला.
हा उपक्रम रावेत येथील ईस्कानच्या ‘गोविंदधाम’तर्फे आयोजित करण्यात आला. कार्यक्रमासाठी विशेष अतिथी म्हणून बजाज ऑटोचे राम तिलक, ऑटोलाइन इंडस्ट्रिजचे शिवाजी आखाडे, रोहिणीकुमार प्रभु, गोपती प्रभु आणि जगदीश गौरांग प्रभु उपस्थित होते.
ही परीक्षा इयत्ता पाचवी ते सातवी आणि आठवी ते दहावी या दोन गटांत पार पडली. पहिल्या गटात कार्तिक सुळे, राणी बिरादार, प्रज्ञा मेंगडे यांच्यासह दुसऱ्या गटात कार्तिक मुसळे, शर्वरी गुर्जर, अक्षरा जगदाळे यांनी अनुक्रमे प्रथम, द्वितीय आणि तृतीय क्रमांक पटकावला. भगवद्गीतेवरील या परीक्षेच्या माध्यमातून विद्यार्थ्यांमध्ये आध्यात्मिक तसेच नैतिक मूल्ये रुजवण्याचा संकल्प करण्यात आला. यावेळी आदर्श मुख्याध्यापक पुरस्कारांचेही वितरण करण्यात आले.