‘टीपी स्कीम’ला सांगवडेतूनही विरोध

सोमाटणे, ता. ८ : ‘‘विकासाच्या नावाखाली शेतकऱ्यांना भूमिहिन करू नका. अन्यथा तीव्र आंदोलन करू,’’ असा इशारा ‘टीपी’ अर्थात नगररचना प्रकल्पाला विरोध करताना सांगवडे ग्रामस्थांनी दिला.

‘पीएमआरडीए’ने नुकत्याच पंधरा नगररचना योजना प्रस्तावित केल्या आहेत. यात सांगवडे गावाचाही समावेश आहे. या प्रकल्पाने सुमारे साडेतीनशे एकर क्षेत्र बाधित होणार आहे. तालुक्यातील सांगवडे हे गाव सर्वाधिक सुपीक शेती आणि अधिक उतारा ऊस उत्पादन करणारे गाव अशी त्याची ओळख आहे. शेती हेच एकमेव उत्पन्नाचे साधन असल्याने शेतकऱ्यांना उध्वस्त करणाऱ्या टीपी प्रकल्पाला शेतकऱ्यांनी कडाडून विरोध केला. या विषयावर ग्रामदैवत भैरवनाथ मंदिरात घेण्यात आलेल्या ग्रामसभेला सरपंच, उपसरपंच, सदस्य आदींसह गावातील सुमारे तीनशे शेतकरी उपस्थित होते. यावेळी सर्वानुमते ‘पीएमआरडीए’च्या या प्रकल्पाला विरोध करण्याचा निर्णय घेण्यात आला. प्रसंगी तीव्र विरोध करण्याचा इशारा देण्यात आला.
अधिकाऱ्यांच्या भुलथापांना बळी पडायचे नाही. यापूर्वी शासनाने आश्वासने दिली. द्रुतगती मार्ग, पवना, कासारसाई, मळवंडी धरण हे प्रकल्प पूर्ण केले. या प्रकल्पातील बाधित शेतकऱ्यांचे अद्याप पुनर्वसन बाकी आहे. हा अनुभव आपणासमोर असताना नव्याने सुरू केलेल्या या प्रकल्पावर विश्वास ठेवणार नाही, असा पवित्रा ग्रामस्थांनी घेतला.
या चर्चेत संत तुकाराम कारखान्याचे माजी संचालक भाऊसाहेब पानमंद, सरपंच रोहन जगताप, उपसरपंच ललिता लिमन यांच्यासह शेतकऱ्यांकडून मांडण्यात आले.

PNE25V38258

नागरिकांनी मांडलेले मुद्दे
‘टीपी स्कीम’मुळे गावातील शेतीचे क्षेत्र कमी होणार, वृक्ष तोडीमुळे पर्यावरणाचे नुकसान होणार, जमिनीचा योग्य मोबदला मिळणार नाही, पारंपरिक शेती उत्पादन नष्ट होणार, सिमेंटचे जंगल वाढून गावपण हरवणार आहे. प्रकल्पाची कोणतीही पूर्वकल्पना शेतकऱ्यांना दिलेली नाही, तरुणांच्या हाताला काम राहणार नाही आदी मुद्दे मांडण्यात आले.