संवाद माझा

संवाद माझा

वाहतूक पोलिस नावापुरतेच
निगडी-भोसरी रस्त्यावरील गवळी माथा चौकातील सिग्नल व्यवस्था केवळ नावासाठी आहे असे वाटते. सिग्नल लाल असतांनाही खासगी बस, रिक्षा, कार, आणि दुचाकीस्वार सिग्नलकडे दुर्लक्ष करून पुढे जातात. चौकाच्या एका कोपऱ्यात वाहतूक पोलिस असहाय्यपणे उभे असल्यासारखे दिसतात. कालच कोथरूड परिसरात एका ज्येष्ठ नागरिकाला रिक्षावाल्याने मारहाण केल्याची बातमी आली आहे. कारण त्यांनी बसस्टॉपवर उभ्या असलेल्या एका रिक्षावाल्याला रिक्षा थोडी पुढे घ्यायला सांगितले. हे ज्येष्ठ नागरिक पुण्यातील अनेक भागांत जाऊन वाहतूक नियंत्रणाचे काम करून वाहतूक पोलिसांना मदत करत असतात.
-शिवराम वैद्य, निगडी
PNE25V38389

तळेगाव-चाकण रस्त्यावर बेशिस्त पार्किंग
तळेगाव-चाकण रस्त्याजवळ भंडारा डोंगरालगत शहरातील अनेक चालक बेशिस्तपणे वाहने उभी करतात. त्यामुळे कोंडी होते. तळेगाव दाभाडे शहरात वाहनतळ उपलब्ध करण्याची मागणी नागरिकांकडून केली जाते. मात्र, या रस्त्यावर खूप गर्दी आहे. चालक मनमानी पद्धतीने वाहन पार्क करत असल्याने त्याचा अनेक वाहनांना अडथळा निर्माण होतो. यातून होणारे वाद आता नित्याचे झाले आहेत.
- सचिन वरघडे, तळेगाव दाभाडे
PNE25V38386

सिग्नल २५ दिवसांपासून बंद
नवीन ऑटो क्लस्टर चौकातील सिग्नल मागील सुमारे २५ दिवसांपासून बंद आहे. सिग्नल यंत्रणा बंद असल्याने वाहतूक पोलिसांवर ताण पडतो आणि वाहतूक कोंडी सोडवण्यासाठी धावपळ करावी लागत आहे. वाहतुकीचा बोजवारा उडाला आहे. त्यामुळे पोलिसांनी या समस्येची तातडीने सोडवणूक करावी.
- श्याम मेमाणे, शाहूनगर
PNE25V38385

बर्ड व्हॅली पदपथावर उंदरांचा वावर
संभाजीनगर येथील महानगर पालिकेचे बर्ड व्हॅलीमधील पदपथ गेली दोन महिन्यांपासून पडली आहे. त्यामुळे सकाळी नागरिकांना फिरता येत नाही. जागोजागी ब्लॉक निघाले असून त्यामधून सर्रास उंदरांचा वावर दिसत आहे. परंतु प्रशासनाचे पूर्ण दुर्लख आहे. ठेकेदाराचे निदर्शनास आणून दिले असता, त्यांनी दुर्लक्ष केले आहे.
- ॲड. पी. एन. जाधव, संभाजीनगर
PNE25V38390

सार्वजनिक स्वच्छतागृहात गैरसोय
संत ज्ञानेश्वर महाराज गार्डन निगडी प्राधिकरण येथील पुरुषांच्या सार्वजनिक स्वच्छतागृह अस्वच्छ आहे. शौचालयातील नळ महिनाभरापासून बंद आहे. नळदेखील तुटलेले आहेत. बेसिनचा नळ गळत आहे. याकडे प्रशासनाने लक्ष द्यावे.
-आनंदा माने, बिजलीनगर, चिंचवड.

Id: PNE25V38388