एक कोटीच्या फसवणूक; मुख्य आरोपीला अटक

पिंपरी, ता. ८ : शेअर मार्केटमधील गुंतवणुकीवर जादा परताव्याचे आमिष दाखवून एक कोटी सात लाखांची फसवणूक करणाऱ्या मुख्य आरोपीला पिंपरी-चिंचवड सायबर पोलिसांनी ओडिसा येथून अटक केली.
रंजन कुमार साहू (वय ४०, रा. कटक, ओडिसा) असे आरोपीचे नाव आहे. गणेश लोखंडे याला यापूर्वी अटक केलेली आहे. तपासादरम्यान आरोपीने वापरलेल्या आयडीएफसी बँक खात्यामध्ये ६९ लाख ७५ हजार रुपये जमा झाल्याचे निष्पन्न झाले. हे खाते ‘गिफ्टिंग प्लांट’ नावाने विक्रोळी, मुंबई येथे नोंदवले गेले होते. त्यानुसार लोखंडे याला विक्रोळी येथून अटक केली. चौकशी दरम्यान त्याने साहू व रमेश परमार या साथीदारांच्या मदतीने कोलकता येथे बँक खात्यावर पैसे घेतल्याचे सांगितले. पोलिसांना साहू पश्चिम बंगाल, ओडिसा, आसाम आदी राज्यांत फिरत असल्याचे आढळले. त्यानुसार दोन महिन्यांनी साहू यास अटक करण्यात आले. या गुन्ह्याच्या प्राथमिक तपासात आरोपीने संबंधित बँक खात्यावर ३७ नागरिकांचे पाच कोटी एक लाख रुपयांची फसवणूक केल्याचे समोर आले आहे.