बहिण-भावाचे नाते रेशीम धाग्याने घट्ट

पिंपरी, ता. ९ ः ‘सण आहे रक्षाबंधनाचा, नेत्रांच्या निरांजनाने भावाला ओवाळण्याचा’ या उक्तीप्रमाणे बहीण-भावाच्या पवित्र नात्याची ओळख असलेला रक्षाबंधन सण शनिवारी शहरात मोठ्या उत्साहात साजरा करण्यात आला. बहिण-भावाचे हळवे नाते रेशीम धागा बांधून अधिक घट्ट करत घरोघरी हा सण साजरा झाला. बहिणीने भावाच्या हातावर राखी बांधत त्याच्या निरोगी आयुष्यासाठी, भरभराटीसाठी प्रार्थना केली. बाजारपेठेत राखीपौर्णिमेनिमित्त आकर्षक ऑफर्स असल्याने बहिणींनी राखी बांधल्यानंतर भावांनी भेटवस्तू देत त्यांना खूष केल्याचे दिसून आले.
शहरात अनेक ठिकाणी सामाजिक जाणिवेतूनही विविध ठिकाणी उपक्रम घेण्यात आले. रक्षाबंधनानिमित्त सकाळपासूनच सगळीकडे महिला-मुलींची तयारी सुरू होती. सकाळी राख्या घेण्यासाठी दुकानांमध्ये गर्दी दिसत होती. घरोघरी सहभोजनाचे बेत आखले होते. आपल्या जिवलगांना भेटायला जायचे असल्याने पीएमपीच्या बसमध्येही गर्दी होती.

महिला प्रवाशांना शुभेच्छा
‘पीएमपी’ने आज महिला प्रवाशांसाठी ‘बसप्रवास करा आणि ‘लकी ड्रॉ’ने पैठणी जिंका’ हा आनंददायी उपक्रम आयोजित केला होता. बसच्या वाहकांनी महिला प्रवाशांना रक्षाबंधनाच्या शुभेच्छा देऊन उपक्रमात सहभागी होण्याचे आवाहन केले. या उपक्रमाला महिलांचा चांगला प्रतिसाद मिळाला. सामाजिक जाणीवेतून अनेक भगिनींनी पोलिस बंधू-भगिनींना राख्या बांधून रक्षाबंधनाचा आनंद द्विगुणित केला.

प्रजापिता ब्रह्माकुमारीनी बांधल्या राख्या
पिंपरी वैभवनगर येथील प्रजापिता ब्रह्माकुमारी ईश्वरीय विश्व विद्यालय पिंपरी सेवा केंद्राच्या वतीने पोलिस स्टेशन, लष्करी कार्यालय, रेल्वे स्टेशन, पोस्ट ऑफिस, वृत्तपत्र विभाग, विविध रुग्णालये, बँक, महाविद्यालये, राजकीय व सामाजिक कार्यालय, धार्मिक संस्था या ठिकाणी रक्षाबंधन करण्यात आले. ब्रम्हकुमारी सुरेखा, सुप्रिया, श्रद्धा, मंगल, अपर्णा विटवेकर, रूपाली जगताप, अन्नपूर्णा जेवरानी, अनुप पाटील, सरदार पाटील, मयूर पाथरकर, नीलेश थोरात यांनी संयोजन केले.

जपली सामाजिक बांधिलकी
पिंपळे गुरव येथील ममता अंधः कल्याण केंद्रातील महाराष्ट्रातील विविध जिल्ह्यातून शिक्षणासाठी आलेल्या विशेष मुलांना रक्षाबंधनानिमित्त स्नेहभोजन देऊन त्याचा आनंद द्विगुणित केला. संस्थेचे संस्थापक तुषार कांबळे, मानवी हक्क संरक्षण आणि जाग्रतीचे, शहराध्यक्ष अण्णा जोगदंड, पश्चिम महाराष्ट्र महिला अध्यक्षा संगीता जोगदंड, संग्राम तळेकर, सलीम मुजावर, समाधान चोपडे, आदेश जोमिवाळे, मीरा देशमुख उपस्थित होते.