करारनाम्‍यातील अटी-शर्तीनुसार वेतन द्या

पिंपरी, ता. १० : पुणे महानगर प्रदेश विकास प्राधिकरणातील (पीएमआरडीए) कंत्राटी कर्मचाऱ्यांना करारनाम्‍यातील अटी-शर्तीनुसार वेतन द्यावे, अशी मागणी कंत्राटी कर्मचाऱ्यांनी केली आहे. पीएमआरडीए आयुक्‍त डॉ. योगेश म्‍हसे, प्रशासन अधिकारी यांना त्‍याबाबत निवेदन देऊन मागणी करण्यात आली आहे. निवेदनावर ६२ कर्मचाऱ्यांनी सही केली आहे.
निवेदनात नमूद केले आहे की, करारनाम्यात नमूद अटींप्रमाणे दरमहा ७ ते १० तारखेला वेतन मिळणे अपेक्षित असूनही प्रत्यक्षात महिन्यानंतरही वेतन मिळत नाही. यामुळे आर्थिक अडचणींना सामोरे जावे लागते. पगाराची रक्कम व प्रत्यक्ष हातामध्ये येणारे वेतन/मानधन यामधील तफावतीचा तपशील उपलब्ध होत नाही. तसेच वेतनातून काही वेतन विविध कारणांसाठी नियमबाह्यपणे कपात करण्यात येतात. यामुळे आमचे वेतनातून/मानधनातून करण्यात येणारे सर्व कपातींचा संपूर्ण तपशील मिळणे आवश्यक आहे. पगाराच्या स्लिप्स व इतर देयकांची पारदर्शक माहिती दिली जात नाही. माहिती न दिल्याबाबतही कर्मचारी नाराजी व्यक्त करत आहेत. स्थानिक प्राधिकरणांकडून त्यांच्या वेतनाशी संबंधित शासकीय हिस्सा न मिळाल्यामुळेही अडचणी निर्माण होत असल्याचे कंत्राटी कर्मचाऱ्यांनी नमूद केले आहे. पीएमआरडीएच्या विविध प्रकल्पांवर काम करणारे हे कर्मचारी व अधिकारी यांनी प्रलंबित वेतन, मानधन आणि इतर देयके तातडीने दिली जावीत. याप्रकरणी संबंधित कंत्राटदार आणि प्राधिकरण प्रशासनाने लवकरात लवकर निर्णय घेऊन थकबाकीची पूर्तता करण्याचे आवाहनही निवेदनाद्वारे केले आहे.
पीएमआरडीएतील कायमस्वरूपी व कंत्राटी कर्मचाऱ्यांच्या आस्थापना बाबींवरील खर्चाची अर्थसंकल्पीय रक्‍कमेच्या १.६० टक्‍के रक्कम अतिशय तुटपुंजी व कमी आहे. यामुळे कंत्राटी कर्मचाऱ्यांना कमी पगारात काम करावे लागत आहे. शासनाचे याबाबतचे धोरणाचा विचार करता प्राधिकरणामध्ये कार्यरत कंत्राटी कर्मचाऱ्यांच्या पगारात भरीव वाढ करण्यास प्राधिकरणास वाव असून, ही वाढ करणे सद्याच्या महागाईचा विचार करता आवश्यक आहे, अशीही मागणी कंत्राटी कर्मचाऱ्यांनी केली आहे.
---