पीएमआरडीएच्या भूखंडांसाठी अर्ज करण्यास मुदतवाढ

पिंपरी, ता. १२ : पुणे महानगर प्रदेश विकास प्राधिकरणातर्फे (पीएमआरडीए) भूखंडांचे ऑनलाइन ई-लिलाव करून ८० वर्षांच्या भाडेपट्टा तत्त्वावर वाटप करण्याच्या अनुषंगाने ऑनलाइन अर्ज करण्यास मुदतवाढ दिली आहे. १८ ऑगस्ट २०२५ पर्यंत नागरिकांना अर्ज करता येणार आहेत. या प्रक्रियेत हवेली, खेड, मावळ व मुळशी या तालुक्यातील विविध गावांतील ३१ सुविधा भूखंड, दोन आरक्षित शैक्षणिक भूखंड आण एक सार्वजनिक सुविधा (लायब्ररी/संगीत विद्यालय) भूखंड यांचे ऑनलाइन ई-लिलाव करण्यात येणार आहे.
पीएमआरडीए प्रशासनाने दिलेल्‍या माहितीनुसार या प्रक्रियेसाठी २१ जुलै २०२५ रोजी जाहीर सूचना प्रसिद्ध केली होती. ११ ऑगस्‍ट २०२५ रोजी सायंकाळी पाचपर्यंत https://eauction.gov.in या संकेतस्थळावर ऑनलाइन अर्ज करण्यास अंतिम मुदत होती. त्यात वाढ करत १८ ऑगस्‍ट २०२५ रोजी सायंकाळी पाचपर्यंत मुदतवाढ देण्यात आली आहे. यानुसार तांत्रिकदृष्ट्या पात्र बोलीदारांची घोषणा तीन सप्‍टेंबर रोजी करण्यात येणार आहे. चार सप्‍टेंबर रोजी सकाळी अकरा वाजता संकेतस्थळावरुन ऑनलाइन ई-लिलाव प्रक्रिया सुरू होईल. इच्छुक व्यक्ती / संस्थांनी ई-लिलाव प्रक्रियेत सहभागी व्हावे, असे आवाहन पीएमआरडीएचे महानगर आयुक्त डॉ. योगेश म्हसे यांनी केले आहे.