दहीहंडी निमित्ताने प्रचाराचे चाखणार ‘लोणी’

पिंपरी, ता. १२ ः गोकूळ अष्टमी आणि गोपाळकाला निमित्त शहरातील विविध मंडळांसह काही राजकीय व्यक्तींनीही शनिवारी (ता. १६) दहीहंडी सोहळे आयोजित केले आहेत. यामध्ये महापालिकेच्या आगामी निवडणुकीसाठी इच्छुकांची संख्या अधिक असून, गोविंदांसाठी लाखोंची बक्षिसे जाहीर केली आहेत. निवडणूक लढविण्याच्या संभाव्य प्रभागामध्ये मोठमोठे फलक लावून नागरिकांचे लक्ष वेधले जात आहे. यातून दहीहंडीच्या निमित्ताने निवडणूक प्रचाराचे लोणी चाखण्याचा प्रयत्न केला जात असल्याचे चित्र आहे.
विविध कारणांमुळे फेब्रुवारी २०२२ पासून लांबणीवर पडलेली महापालिका निवडणूक चालू वर्षाच्या अखेरीस किंवा पुढील वर्षाच्या सुरुवातीला होण्याची शक्यता आहे. त्यादृष्टिने राज्य निवडणूक आयोगाच्या आदेशानुसार महापालिका निवडणूक विभागाने तयारी सुरू केली आहे. राज्य सरकारने चार सदस्यीय प्रभाग पद्धतीने निवडणूक घेण्याचा निर्णय घेतला आहे. त्यानुसार महापालिका निवडणूक विभागाने प्रारूप प्रभाग रचना आराखडा तयार केला आहे. तो राज्याच्या नगरविकास विभागाला पाच ऑगस्ट रोजी सादर केला आहे. त्यावर २२ ते २९ ऑगस्ट या कालावधीत नागरिकांकडून हरकती व सूचना मागवण्यात येणार आहेत. त्यावर सुनावणी होऊन अंतिम प्रभाग रचना जाहीर होईल. शिवाय, महापालिका निवडणुकीच्या अनुषंगाने मतदारयाद्या अद्ययावत करण्याचे कामही सुरू आहे. या हालचाली पाहून महापालिका निवडणुकीसाठी इच्छुक असणाऱ्यांच्या आशा पल्लवीत झाल्या आहेत. कोणत्या ना कोणत्या कारणाने मतदारांपर्यंत पोहोचण्याचे प्रयत्न अनेकांकडून केला जात आहे. त्यासाठी सण-उत्सव, विशेष दिनांचा आधार घेतला जात आहे. फलकबाजी करून मतदारांचे लक्ष्य वेधण्याचे काम सुरू आहे.

दहीहंडी निमित्त...
यावर्षी गोकूळ अष्टमी व गोपाळकाला एकाच दिवशी अर्थात शनिवारी (ता. १६) आहे. त्यानिमित्त अनेकांनी दहीहंडी सोहळ्यांचे आयोजन केले आहे. त्यासाठी लाखोंची बक्षीसे जाहीर केली आहेत. निवडणूक लढविण्याच्या संभाव्य प्रभागात फलक लावून जाहिरातबाजी सुरू आहे. त्यासोबतच स्वातंत्र्यदिनाचे शुभेच्छा फलकही दिसू लागले आहेत.

चार वर्ष प्रयत्न...
महापालिकेची मुदत १३ मार्च २०२२ रोजी संपली आहे. तिच्या निवडणुकीची तयारी इच्छुकांनी २०२१ पासूनच सुरू केली होती. मात्र, विविध कारणांनी वेळेत निवडणूक झाली नाही. दरम्यानच्या काळात, तत्कालीन सरकारने तीन सदस्यीय पद्धतीने निवडणूक घेण्याचे जाहीर केले होते. त्याची प्रभाग रचनाही जाहीर झाली होती. मात्र, राज्यात सत्ता बदल झाल्याने तो निर्णय बारगळला. आता चार सदस्यीय प्रभाग पद्धतीने निवडणूक होणार आहे. त्यासाठी इच्छुकांनी तयारी सुरू केली आहे.