पिंपरीतील गोळीबाराचे पुजारी टोळीशी ‘कनेक्शन’

पिंपरी, ता. १३ : पिंपरी येथे भरवस्तीत गोळीबार करून दुकानदाराला जखमी करणारा आरोपी कुख्यात रवी पुजारी टोळीचा शुटर असल्याचे पोलिस तपासात उघड झाले आहे. त्याने यापूर्वी सहा वेळा गोळीबार केला असून बांधकाम व्यावसायिकांना लक्ष करण्याची त्याची गुन्हेगारी पद्धत आहे. चिंचवड परिसरातून मोटारसायकल चोरून त्याने पिंपरीत येथे गुन्हा केला होता. पैशांची चणचण भासल्याने त्याने हे कृत्य केल्याची कबुली दिली आहे.

रवींद्र भाऊसाहेब घारे (४०, रा. ताम्हाणे वस्ती, टॉवर लाइन, चिखली, मूळ ओझर्डे, मावळ) असे आरोपीचे नाव आहे. त्याने एक ऑगस्टच्या दुपारी पिंपरी येथील दुकानात व्यापाऱ्याची सोनसाखळी हिसकावण्याचा प्रयत्न केला. अर्धी चैन मिळाल्यानंतर उर्वरित मिळवण्यासाठी त्याने तरुणाच्या डाव्या मांडीवर गोळी झाडली होती. घारे हा रवी पुजारी व सुरेश पुजारी टोळीचा सदस्य असून सुपारी घेऊन खंडणी, खून, जबरी चोरी करणारा शार्पशुटर आहे. नवी मुंबईतील बांधकाम व्यावसायिकावर गोळीबार प्रकरणी मोक्का अंतर्गत कारवाई झाल्यानंतर तो फरार होता. त्याच्यावर खून, खुनाचा प्रयत्न, खंडणी, जबरी चोरी, वाहनचोरी व गोळीबार असे २५ गंभीर गुन्हे नोंद आहेत.
पोलिस आयुक्त विनय कुमार चौबे यांनी १० पथके तयार करून शोधमोहीम सुरू केली. ७०० हून अधिक सीसीटीव्ही फुटेज तपासण्यात आले. आरोपीच्या शरीरयष्टीवरून ओळख पटवत ६ ऑगस्ट रोजी चिखली येथून आरोपीला अटक करण्यात आली.
या कारवाईमुळे चिंचवड, एमआयडीसी भोसरी व वडगाव मावळ येथील वाहनचोरीचे आणखी तीन गुन्हे उघड झाले आहेत. ही कारवाई मालमत्ता गुन्हे विरोधी पथकाचे वरिष्ठ पोलिस निरीक्षक विजय ढमाळ, सहायक पोलिस निरीक्षक दतात्रय गुळीग, पांडुरंग देवकाते, गोरक्षनाथ बालवडकर आणि पथकातील पोलीस अंमलदारांनी केली.