तहसील कार्यालयातील सर्व्हरमध्ये पुन्हा बिघाड

पिंपरी, ता. १३ : निगडीतील तहसिल कार्यालयातील सेतू केंद्रातील सर्व्हरमध्ये मंगळवारी पुन्हा तांत्रिक बिघाड झाला. त्यामुळे नागरिकांना दाखले मिळण्यास उशीर झाला. सकाळपासून आलेल्‍या नागरिकांना अनेक तास रांगेत थांबावे लागले. अनेकांचे अर्ज दाखल करून त्यांना पुन्हा येण्यास सांगितले गेले. सर्व्हर सारखा बिघडत असल्याने सरकारी योजना, घरकुलासाठी आवश्यक असलेले दाखले आणि प्रमाणपत्र मिळण्यासाठी अर्जदारांना त्रास सहन करावा लागत आहे. सेतू केंद्रात १३ प्रकाराच्या दाखल्यांसाठी दिवसाकाठी सुमारे तीनशे अर्ज येतात. याबाबत काही नागरिकांनी तहसीलदारांकडे तक्रार केली. कर्मचाऱ्यांना त्यांनी रात्री उशिरापर्यंत काम करण्याची सूचना केली होती, मात्र सर्व्हरमुळे नागरिकांची गैरसोय कायम राहिली.
-----