शहरात कृष्ण जन्माष्टमीच्या तयारीचा उत्साह

पिंपरी, ता. १४ : गोकुळाष्टमी अर्थात कृष्ण जन्माष्टमीच्या तयारीचा उत्साह पिंपरी-चिंचवड शहरात ठिकठिकाणी दिसून येत आहे. बाजारपेठांमध्ये रंगविलेली मडकी, सजावटीचे साहित्य, श्रीकृष्णाचे पोशाख, मूर्ती आणि पूजा साहित्याची खरेदी करण्यासाठी गर्दी दिसून आली. तसेच कृष्ण मंदिरांमध्येही जय्यत तयारी करण्यात येत आहे.

कृष्ण जन्माष्टमीच्या दिवशी सकाळपासूनच निगडीतील कृष्ण मंदिर, तसेच रावेत येथील इस्कॉन मंदिर येथे भाविकांची मोठी गर्दी असते. त्यामुळे या मंदिर प्रशासनाकडून जय्यत तयारी केली जात आहे. जन्माष्टमीच्या मध्यरात्री बरोबर बारा वाजता श्रीकृष्ण जन्म साजरा केला जातो. या सोहळ्यावेळीही शेकडो भाविक असतात. त्यामुळे मंदिर पहाटेपासून रात्री उशिरापर्यंत दर्शनासाठी खुली ठेवण्यात येतात. या दोन दिवसांमध्ये श्रीकृष्ण जन्मसोहळ्यासोबतच विविध कार्यक्रमांचेही आयोजन केले जाते.

शाळांमध्ये दहीहंडी उत्सव
यंदा श्रीकृष्ण जन्माष्टमी स्वातंत्र्यदिनादिवशी आली आहे. त्यामुळे जन्माष्टमीच्या एक दिवस आधीच शाळांमध्ये कृष्णजन्माष्टमी व दहीहंडी कार्यक्रमाचे आयोजन करण्यात आले. त्यामुळे कृष्ण, राधा यांची वेशभूषा करून शाळेत जाणारे बाळगोपाळ, लहान मुलांनी फोडलेली दहीहंडी, शाळेत झालेले सांस्कृतिक कार्यक्रम असे वातावरण गुरुवारी (ता.१४) दिसून आले. कृष्ण व राधेचे पोशाख व दागिने घेण्यासाठी दोन दिवस आधीपासूनच पालकांची लगबग दिसून आली.

दहीहंडीच्या तयारीला वेग
गोकुळाष्टमीच्या दुसऱ्या दिवशी असणाऱ्या दहीहंडी उत्सवाची शहरात जोरदार तयारी सुरू असून मंडळांच्या कार्यकर्त्यांमध्ये उत्साह दिसून येत आहे. शहरात भोसरी, मोशी, हिंजवडी, चिखली, वाकड, सांगवी प्राधिकरण या भागातील दहीहंडीचे नागरिकांना आकर्षण असते. शहरातील मंडळांनी याही वर्षी दहीहंडीसाठी सिनेतारका आणि स्थानिक कलावंतांनाही आमंत्रित केले आहे.

पिंपरीत उत्सव
संदीप वाघेरे युवा मंचतर्फे दहीहंडी उत्सवाचे आयोजन शनिवारी (ता. १६) सायंकाळी सहा ते नऊ या वेळेत केले आहे. त्यास अभिनेत्री श्रिया सरण, सायली संजीव, आयेशा खान उपस्थित राहतील.
---