भरधाव मिक्सरच्या धडकेत अकरा वर्षीय मुलीचा मृत्यू

पिंपरी, ता. १४ : हिंजवडी परिसरात अवजड वाहनांना बंदी असलेल्या वेळेत भरधाव मिक्सर ट्रक चालवून एका दुचाकीला धडक दिली. या अपघातात दुचाकीवरील ११ वर्षीय मुलीचा मृत्यू झाला. तर तिची आई गंभीर जखमी झाली आहे. ही घटना हिंजवडीतील फेज दोन येथील इन्फोसिस सर्कलजवळील रस्त्यावर घडली.
प्रत्युषा बोराटे (वय ११) असे या अपघातात मृत्यू झालेल्या मुलीचे नाव आहे. तर तिची आई वैशाली बोराटे (वय ५३) या गंभीर जखमी झाल्या आहेत. या प्रकरणी सागर आगलावे (रा. बुधवार पेठ, पुणे) यांनी हिंजवडी पोलिस ठाण्यात फिर्याद दिली आहे. त्यानुसार पोलिसांनी फरहान शेख (वय २५, रा. विनोदे चौक, वाकड मूळ- बिहार) याला अटक केली आहे. हिंजवडी परिसरात सकाळी आठ ते दुपारी बारा आणि सायंकाळी चार ते रात्री नऊ या वेळेत अवजड वाहनांच्या वाहतुकीस बंदी आहे. तरीही आरोपी शेख याने या नियमाचे उल्लंघन करून, भरधाव वेगात मिक्सर ट्रक चालवला. त्याने वैशाली यांच्या दुचाकीला जोरात धडक दिली.