शाळांमध्ये पसायदान

पिंपरी ः संत ज्ञानेश्वर महाराजांच्या ७५० व्या जन्मोत्सवानिमित्त शहरातील सर्व शाळांमध्ये स्वातंत्र्यपूर्वदिनी (ता. १४) ध्वजवंदन, पसायदानाचे सामूहिक पठण करण्यात आले. समर्पक पेहराव करून, देशभक्तिपर पार्श्वसंगीताचा वापर करून प्रभावी पद्धतीने विद्यार्थ्यांच्या कवायतींचे सादरीकरण केले. शालेय शिक्षण विभागाने स्वातंत्र्यदिन विविध उपक्रमांसह साजरा करण्याबाबतच्या मार्गदर्शक सूचना ३१ डिसेंबर २०२४ रोजी प्रसिद्ध केल्या होत्या. त्यात प्रभातफेरी, भाषण स्पर्धा, कविता स्पर्धा, नृत्य स्पर्धा, चित्रकला स्पर्धा, खेळ अशा विविध उपक्रमांनी स्वातंत्र्य दिन साजरा करण्याबाबत स्पष्ट करण्यात आले होते. हिंदुस्थान अँटिबायोटिक्स प्राथमिक व पूर्व प्राथमिक शाळेत आज सामूहिक पसायदान म्हणण्यात आले. मुख्याध्यापिका सुरेखा जाधव ,ज्येष्ठ शिक्षक अर्चना गोरे, डॉ. विठ्ठल मोरे यांच्या हस्ते ज्ञानेश्वरीचे पूजन करण्यात आले. पहिलीची ज्ञानेश्वरी इथापे संतश्रेष्ठ ज्ञानेश्वरांचे वेशभूषेत आली होती. बालवर्गापासून ते चौथीपर्यंतचे सर्व विद्यार्थी, शिक्षक व शिक्षकेतर कर्मचाऱ्यांनी मनोभावे पसायदान म्हटले.