लोखंडी जॉब अंगावर पडल्याने दुचाकीस्वार जखमी

पिंपरी, ता. १४ : उड्डाणपुलावरून जाणारा भरधाव टेम्पो उलटल्याने त्यातील लोखंडी जॉब उड्डाणपुलावरून खाली पडले. हे जॉब पुलाखालील रस्त्याने जाणाऱ्या दुचाकीस्वाराच्या अंगावर पडल्याने दुचाकीस्वार गंभीर जखमी झाला. ही घटना पुणे-नाशिक महामार्गावरील भोसरीतील छावा चौकात घडली.
रितेश घोगरे (वय २१, रा. भोसरी, मूळ- नेर्ले, करमाळा, सोलापूर) असे या अपघातात जखमी झालेल्याचे नाव आहे. या प्रकरणी भोसरी पोलिसांनी अनिल सूर्यवंशी (रा. तळवडे) या टेम्पो चालकावर गुन्हा दाखल केला आहे. सूर्यवंशी हा त्याच्या टेम्पोतून एका कंपनीचे जॉब घेऊन जात असताना टेम्पो उलटला. दरम्यान, घोगरे हे नाशिक फाट्याहून चाकणच्या दिशेने जात असताना जॉब त्यांच्या अंगावर पडल्याने ते जखमी झाले. त्यांच्यावर पिंपरीतील खासगी रुग्णालयात उपचार सुरु आहेत.