गुगल मॅपवरून सोसायटी हेरणारे घरफोडे अटकेत

पिंपरी, ता. १८ : गुगल मॅपद्वारे आलिशान सोसायटीचे लोकेशन शोधून घरफोडी करणाऱ्या दोन परप्रांतीय चोरट्यांना पिंपरी-चिंचवड पोलिसांच्या गुन्हे शाखा युनिट दोनच्या पथकाने अटक केली. आनंदसिंह सरदार (वय २२, रा. डुंगरपूर, राजस्थान) व गुरुदीप सिगलीकर (वय २०, रा. रतलाम, मध्य प्रदेश) अशी आरोपींची नावे आहेत. जुनी सांगवीतील पवारनगरमध्ये २९ सप्टेंबरला घरफोडी झाली. सीसीटीव्ही फुटेजवरून पोलिसांनी तांत्रिक विश्लेषण केले. त्यानंतर संबंधित ठिकाणी जाऊन चोरट्यांना ताब्यात घेण्यात आले. आरोपींनी वापरलेली दुचाकी पोलिस ठाण्यात दाखल असलेल्या गुन्ह्याशी संबंधित असल्याचे उघड झाले. पोलिसांनी आरोपींकडून घरफोडीच्या गुन्ह्यातील तीन लाख ६० हजार रुपये किमतीचे दागिने जप्त केले. दोन्ही आरोपी सराईत गुन्हेगार असून ते बसने ये-जा करायचे. लॉजवर राहण्यासाठी ते खोटे आधारकार्ड देत असत.
-----