वाकड, पुनावळे, किवळे कोंडी सुटणार

पिंपरी, ता. १७ ः जुन्या पुणे-मुंबई महामार्गावरील देहूरोड येथील सेंट्रल चौक आणि मुंबई-बंगळुरू महामार्गावरील (देहूरोड-कात्रज बाह्यवळण मार्ग) किवळे मुकाई चौक, पुनावळे, ताथवडे, वाकड येथील भूमकर व भुजबळ चौकातील वाहतूक कोंडी लवकरच सुटण्याचा मार्ग मोकळा झाला आहे. कारण, बाह्यवळण मार्गाच्या दोन्ही बाजूंच्या सेवा रस्त्यांचे प्रत्येकी १२ मीटर रुंदीकरण आणि किवळे ते बालेवाडी स्टेडिएमपर्यंत सुमारे ८.६ किलोमीटर अंतरावर ‘एलिव्हेटेड कॉरिडॉर’ची (उन्नत मार्ग) निर्मिती करण्यात येणार आहे. त्याचा ‘डीपीआर’ तयार असून आवश्यक जागेचे महापालिकेने भूसंपादन सुरू केले आहे.
पिंपरी चिंचवड महापालिका हद्दीतून मुंबई-बंगळुरू महामार्ग जातो. वाकड भूमकर चौक, ताथवडे व पुनावळेतील भुयारी मार्ग, किवळेतील मुकाई चौक आणि देहूरोड येथील सेंट्रल चौकात अनेकदा वाहतूक कोंडी होते. ती सोडविण्यासाठी आणि भविष्यातील नियोजनाबाबत भारतीय राष्ट्रीय राजमार्ग प्राधिकरणामार्फत महापालिकेत गेल्या महिन्यात सादरीकरण केले. त्यानुसार कामाला लवकरच सुरुवात होण्याची शक्यता आहे. त्यामध्ये किवळे मुकाई चौक ते बालेवाडी स्टेडियमपर्यंत ‘एलिव्हेटेड कॉरिडॉर’ची निर्मिती केली जाणार आहे. त्याबाबतचा आराखडा तयार आहे.

भूसंपादन प्रक्रिया सुरू
राष्ट्रीय महामार्ग प्राधिकरणाला जवळपास ८५ टक्के शेतकऱ्यांनी जमिनीचा ताबा दिला आहे. आता अतिक्रमणे हटविण्यासाठी मार्किंग सुरू आहे. शेतकऱ्यांना मोबदला मिळावा यासाठी त्यांनी त्वरीत नगररचना विभागात प्रस्ताव दाखल करावेत. काही ठिकाणी कॅम्प लावून मोबदला दिला जाईल, असे महापालिका नगररचना विभागातील एका अधिकाऱ्यांनी सांगितले.

असा असेल एलिव्हेटेड मार्ग
- एलिव्हेटेड मार्गिका (लेन) ः चार
- रस्त्यावरील मार्गिका ः चार
- वाकड भूमकर चौक ः दुमजली उड्डाणपूल
- मुळा नदीवर पूल ः तीन मार्गिका वाढविणार
- मुठा नदीवरील पूल ः दोन्ही बाजूस तीन मार्गिका वाढविणार
- भुयारी मार्ग ः किवळे चौक, समीर लॉन, पुनावळे, ताथवडे, भूमकर चौक