तुकोबारायांच्या पालखीला शहरवासियांचा निरोप

पिंपरी, ता. २० ः पहाटे पडणारा हलका पाऊस, ढगाळ हवामानामुळे वातावरणात असलेला गारवा, त्यानंतर सकाळी चाललेला ऊन- सावलीचा खेळ आणि टाळ मृदुंगाच्या गजरात मार्गस्थ होणारे वारकरी अशा वातावरणात जगद्गुरू संत तुकाराम महाराजांचा पालखी सोहळा उद्योगनगरीतून पुण्याकडे मार्गस्थ झाला. पालखी सोहळ्याला निरोप देण्यासाठी पिंपरी चिंचवडकरांनी जुन्या मुंबई- पुणे महामार्गाच्या दुतर्फा गर्दी केली होती. गेले दोन दिवस शहर व परिसरात मुसळधार पावसाने हजेरी लावली होती. मात्र, शुक्रवारी (ता. २०) पावसाने विश्रांती घेतली आणि तुकाराम महाराजांच्या पालखीला निरोप देण्यासाठी उद्योगनगरीत जनसागर उसळला. कपाळी रेखाटलेले केशरी गंध, लहानग्यांनी केलेली वारकऱ्यांची वेशभूषा, पारंपरिक वेशभूषा करून आलेले महिला व तरुण, दर्शनासाठी रथाच्या बाजूला झालेली गर्दी, सजवलेल्या पालखी रथाचे घेतले जाणारे फोटो असे वातावरण संपूर्ण उद्योगनगरीत दिसून आले.
गुरुवारी पिंपरी चिंचवडमध्ये विसावलेला संत तुकाराम महाराजांचा पालखी सोहळा शुक्रवारी (ता. २०) पहाटे पाच वाजता पुण्याकडे मार्गस्थ झाला. त्यापूर्वी आकुर्डीतील विठ्ठल मंदिरात काकड आरती व महापूजा करण्यात आली. पिंपरी चिंचवडचे आयुक्त शेखर सिंह यांच्या हस्ते यावेळी महापूजा झाली. दोन दिवसांचा पावसाचा जोर ओसरला असला तरी पहाटे पावसाच्या सरी येत होत्या. मात्र, तरीही रस्त्याच्या दुतर्फा पालखीच्या दर्शनासाठी नागरिकांनी गर्दी केली होती. सकाळी सातच्या सुमारास पालखी सकाळच्या विसाव्यासाठी खराळवाडी येथील विठ्ठल मंदिरात थांबली. या मंदिरातही आजूबाजूच्या परिसरातील नागरिकांनी दर्शनासाठी गर्दी केली होती. यावेळी पालखी सोहळ्यातील दिंड्यांनी देखील न्याहारीसाठी काही काळ विसावा घेतला. यावेळी स्थानिक नागरिकांकडून वारकऱ्यांना फळे, चहा व फराळाचे वाटप करण्यात आले. येथील पाहुणचार घेतल्यानंतर त्यानंतर सोहळा पुढे मार्गस्थ झाला. बाराच्या सुमारास पालखी सोहळा दापोडी येथे पोचला. या ठिकाणी दुपारची विश्रांती घेतल्यानंतर हॅरिस पुलावरून पिंपरी चिंचवडमधून पालखीने पुण्यामध्ये प्रवेश केला.

विद्यार्थ्यांकडून मोफत औषध वाटप
पालखी सोहळ्यात आलेल्या वारकऱ्यांसाठी डॉ. डी. वाय. पाटील ज्ञान प्रसाद विद्यापीठ, स्कूल ऑफ फार्मसी अँड रिसर्च, इव्होनेक्स्ट हेल्थकेअर व डॉ. डी. वाय. पाटील कॉलेज ऑफ आयुर्वेद व रिसर्च सेंटर यांच्यावतीने आरोग्य तपासणी शिबिराचे आयोजन करण्यात आले होते. शुक्रवारी एच. ए. कॉलनी येथे पार पडलेल्या या शिबिरात संत तुकाराम महाराज पालखी सोहळ्यातील वारकऱ्यांची आरोग्य तपासणी करून औषधांचे मोफत वाटप करण्यात आले. यामध्ये या महाविद्यालयाचे विद्यार्थी व ‘एनएसएस’ विभागाचे स्वयंसेवक सहभागी झाले होते.