गुन्हे वृत्त

कंत्राटदाराची तेरा लाखांची फसवणूक

पिंपरी : मंत्रालयात ओळख असून रिंगरोडचे काम मिळवून देतो, असे सांगत एकाची तेरा लाख रुपयांची फसवणूक केली. प्रकार बाणेर येथे घडला. या प्रकरणी मुळशी तालुक्यातील घोटावडे येथील २९ वर्षीय व्यक्तीने फिर्याद दिली आहे. त्यानुसार पठाण खान याच्यावर गुन्हा दाखल झाला आहे. आरोपीने माझी मंत्रालयात ओळख आहे, असे सांगून फिर्यादी यांना तुम्हाला रिंगरोडचे काम मिळवून देतो, असे सांगून फिर्यादीला विश्वासात घेतले. त्यानंतर त्यांच्याकडून वेळोवेळी रोख व वेगवेगळ्या अकाउंटवर ऑनलाइन तेरा लाख रुपये घेऊन फिर्यादीची फसवणूक केली.

वाहनाच्या धडकेत महिला गंभीर जखमी
पिंपरी : भरधाव वाहनाने दिलेल्या धडकेत पादचारी महिला गंभीर जखमी झाली. ही घटना रावेत येथे घडली.
अस्मिता संजय कांबळे (वय ३८) असे या घटनेत जखमी झालेल्या महिलेचे नाव आहे. याप्रकरणी त्यांचे पती संजय धोंडिबा कांबळे (रा. वाल्हेकरवाडी, चिंचवड) यांनी फिर्याद दिली आहे. त्यानुसार एका अज्ञात वाहन चालकावर गुन्हा दाखल झाला आहे. औंध-रावेत रस्त्याने पायी त्या जात होत्या. सिलेस्टाईल सिटी चौक येथे रस्ता ओलांडत असताना भरधाव वाहनाने त्यांना जोरात धडक दिली. अपघातानंतर वाहनचालक पसार झाला.

बेकायदा दारू विक्री प्रकरणी दोघांवर गुन्हा
पिंपरी : निगडी व वाकड येथे पोलिसांनी केलेल्या दोन वेगवेगळ्या कारवाईत बेकायदा दारू विक्री करणाऱ्या दोन जणांवर गुन्हा दाखल झाला आहे. निगडीतील संग्रामनगर येथील पत्राच्या शेडमध्ये मालमत्ता गुन्हे विरोधी पथकाने ही कारवाई केली. त्यामध्ये आकाश अनिल रोकडे (वय २४, रा. ओटा स्कीम, इंदिरानगर, निगडी) याच्यावर गुन्हा दाखल झाला आहे. त्याने विक्रीसाठी सात हजार रुपये किमतीची ७० लिटर गावठी दारू बाळगली. तर वाकडमधील वाकडकर वस्ती येथे केलेल्या कारवाईत गुन्हे शाखेच्या अमली पदार्थ विरोधी पथकाने केलेल्या कारवाईत एका महिलेवर गुन्हा दाखल झाला आहे. आरोपी महिलेने विक्रीसाठी साडेनऊ हजार रुपये किमतीची ९५ लिटर दारू जवळ बाळगली.