मिळकतकर भरा; २ टक्के दंड वाचवा करसवलतींचा लाभ घेण्याचे महापालिकेचे आवाहन; ३० जूनपर्यंत मुदत

पिंपरी, ता. २२ ः महापालिका करआकारणी व करसंकलन विभागाने मालमत्ता कर भरणाऱ्यांसाठी विविध सवलती जाहीर केल्या आहेत. त्यांचा लाभ घेण्याची अंतिम मुदत ३० जून आहे. म्हणजेच पुढील आठ दिवसांत नागरिकांना मिळकतकर सवलत योजनेचा लाभ घेता येणार आहे. या योजनेचा सर्वाधिक १० टक्के सवलत लाभ ऑनलाइन पद्धतीने मिळकत कर भरणाऱ्यांना आणि ३० टक्क्यांपर्यंत सवलत लाभ महिला मिळकतधारकांना (महिलांच्या नावावर मिळकत) मिळणार आहे. एक जुलैपासून दोन टक्के विलंब शुल्क (दंड) भरावे लागणार आहे.
महापालिकेने ‘सिद्धी उपक्रम’ अंतर्गत महिला बचत गटांमार्फत सहा लाख ३५ हजार मिळकतधारकांना घरोघरी जाऊन बिलांचे वाटप केले आहे. त्याचसोबत अनेक मिळकतधारकांना थकबाकी वसुलीसाठी जप्तीच्या नोटिसाही बजावल्या आहेत. त्यांच्यावर लवकरच जप्तीची कारवाईही केली जाणार आहे. या मोहिमेमुळे एप्रिल ते १९ जून दरम्यान महापालिकेला ३५९ कोटी ८५ लाख रुपयांचा मिळकतकर संकलित झाला आहे. दरम्यान, २०२४-२५ या आर्थिक वर्षामध्ये थकबाकीदारांकडून प्राप्त झालेल्या धनादेशांपैकी न वटलेल्या धनादेशाची एकूण कराची रक्कम १० कोटी १५ लाख रुपये आहे. ज्या मिळकतधारकांचा धनादेश वटला नाही, अशा मिळकतधारकांना नोटीस देत त्यांना त्यांची रक्कम रोख व ऑनलाइन माध्यमातूनच भरावी लागेल, असे महापालिकेच्या कर संकलन विभागाने स्पष्ट केले आहे.

अशा मिळतील सवलती
३० जूनपर्यंत लागू सामान्य सवलती
- स्वातंत्र्यसैनिक किंवा पत्नीच्या नावावरच्या एका निवासी मालमत्तेस ः ५० टक्के
- महिलांच्या नावावरील एका निवासी मालमत्तेस ः ३० टक्के
- ४० टक्के किंवा त्यापेक्षा जास्त अपंगत्व (दिव्यांग) व्यक्तींच्या एका मालमत्तेस ः ५० टक्के
- संपूर्ण कराची रक्कम आगाऊ भरणाऱ्यास ५ टक्के सवलत

खासगी शैक्षणिक संस्थांना सवलती
- माझी मिळकत माझी आकारणी योजनेअंतर्गत नोंदणीकृत मालमत्तेस ः ६९ टक्के;
- नवीन आकारणी झालेल्या मालमत्ता ः ५ टक्के
- सलग तीन वर्षे नियमित कर भरणाऱ्यास ः २ टक्के
- एप्रिल ते जून दरम्यान ऑनलाइन एकरकमी भरणाऱ्यास ः ५ टक्के
- माजी सैनिक, शहीद सैनिकांच्या कुटुंबीयांसाठी ः १०० टक्के
- इलेक्ट्रिक वाहन चार्जिंग स्टेशन ः २ टक्के

‘‘नागरिकांनी वेळेवर आणि प्रामाणिकपणे मालमत्ता कर भरल्यास महापालिकेला शहरातील पायाभूत सुविधा, स्वच्छता, आरोग्य आणि शिक्षण यामध्ये आणखी सुधारणा करता येते. कर भरण्यास दिल्या जाणाऱ्या सवलती म्हणजे वेळेवर कर भरणाऱ्यांचा सन्मान आहे. नागरिकांनी ३० जूनपूर्वी कर भरून सवलतींचा लाभ घेऊन शहर विकासात योगदान द्यावे.
- प्रदीप जांभळे पाटील, अतिरिक्त आयुक्त, महापालिका

‘‘महापालिकेने सिद्धी उपक्रमाअंतर्गत महिला बचत गटांच्या माध्यमातून सहा लाख ४० हजार मालमत्ताधारकांपर्यंत थेट संपर्क साधत बिलांचे वितरण केले आहे. यामुळे नागरिकांमध्ये जागरूकता वाढली असून, आत्तापर्यंत ३५९ कोटींहून अधिक रक्कमेचा कर भरणा झाला आहे. नागरिकांनी उर्वरित काही दिवसांत ऑनलाइन किंवा थेट रोखीने कर भरून, सवलतींचा लाभ घ्यावा.
- अविनाश शिंदे, सहाय्यक आयुक्त, महापालिका
---