गुन्हे वृत्त चिंचवडमध्ये महिलेला तिघांकडून मारहाण

पिंपरी : पतीला चुकीची माहिती सांगितल्याच्या रागातून एका महिलेला तिघांनी मिळून शिवीगाळ व मारहाण केली. ही घटना चिंचवडमधील केशवनगर येथे घडली.
याप्रकरणी मारहाण झालेल्‍या एका महिलेने चिंचवड पोलिस ठाण्‍यात फिर्याद दिली आहे. त्यानुसार पोलिसांनी दोन महिलांसह विजय भगवान जाधव (तिघेही रा. पागेची तालीम, केशवनगर, चिंचवडगाव) यांच्यावर गुन्‍हा दाखल केला आहे. फिर्यादी या घरासमोर उभ्या असताना आरोपी तेथे आले. फिर्यादी यांनी एका आरोपी महिलेच्या पतीला तिच्याविषयी चुकीची माहिती सांगते याचा राग मनात धरून आरोपींनी फिर्यादीला शिवीगाळ केली. दुसऱ्या महिला आरोपीने फिर्यादीच्या डोक्याचे केस धरून मारहाण केली, तर दुसऱ्या एका महिला आरोपीने फिर्यादीचे हात पकडले आणि विजय जाधव याने दगडाने डोक्यात मारून गंभीर जखमी केले.

मोटारीच्या धडकेत दुचाकीस्वार जखमी
पिंपरी : भरधाव मोटारीने धडक दिल्‍याने दुचाकीस्‍वार गंभीर जखमी झाला. ही घटना पुनावळे अंडरपासजवळ घडली. सचिन पांडुरंग लोहार (वय ४५) असे जखमी झालेल्‍या दुचाकीस्‍वाराचे नाव आहे. याप्रकरणी त्‍यांच्या पत्‍नीने रावेत पोलिस ठाण्‍यात फिर्याद दिली आहे. त्यानुसार पोलिसांनी हेमंत सुभाष ढगे (रा. शिवशंकर कॉलनी, चक्रपाणी वसाहत, भोसरी) याच्‍यावर गुन्‍हा दाखल केला आहे. सचिन लोहार हे त्यांच्या दुचाकीवरून जात असताना हेमंत ढगे याने त्यांच्या दुचाकीला जोरात धडक दिली. यामध्ये लोहार हे गंभीर झाले असून, त्यांच्या दुचाकीचे नुकसान झाले.
----
गांजा विक्री प्रकरणी एकाला अटक
पिंपरी : गांजाची बेकायदारीत्या विक्री करणाऱ्या एका तरुणाला पोलिसांच्या अमली पदार्थ विरोधी पथकाने अटक केली. ही कारवाई पिंपरीतील तपोवन मंदिर रोड परिसरात करण्यात आली.
योहान अरुण आंब्रे (वय १९, रा. वाघेरे चाळ, पिंपरी) असे आरोपीचे नाव आहे. एका व्यक्तीकडे गांजा असल्याची माहिती पथकाला मिळाली. त्यानुसार सापळा रचून पोलिसांनी आंब्रे याला ताब्यात घेतले. त्याच्याकडून नऊ हजार ७०० रुपयांचा गांजा जप्त करण्यात आला.

दारू विक्री प्रकरणी एकावर गुन्हा
पिंपरी : बेकायदारीत्या देशी विक्री करणाऱ्या व्यक्तीवर गुन्हा दाखल करण्यात आला आहे. ही कारवाई मोशी येथील गणेशनगर येथे करण्‍यात आली.
अनिल अप्पाराव भुंबे (वय ३९, रा. शिवाजीवाडी, मोशी) असे गुन्‍हा दाखल झालेल्या व्यक्तीचे नाव आहे. आरोपी भुंबे याच्‍या ताब्यातून तीन हजार २२० रुपये किमतीच्या ४६ देशी दारूच्‍या बाटल्या जप्त करण्यात आल्‍या. आरोपीने हा दारू साठा विक्रीसाठी बाळगला होता.
---------------------

जुगार प्रकरणी महिलेवर गुन्हा
पिंपरी : रस्त्यालगत सुरु असलेल्या जुगार प्रकरणी एका महिलेवर चिखली पोलिसांनी गुन्हा दाखल केला आहे. ही कारवाई चिखली परिसरातील विसावा चौकाजवळ करण्यात आली.
भोसरीतील चक्रपाणी वसाहत येथील आरोपी महिला रस्त्याच्या कडेला ठेवलेल्या बॅनरवर नागरिकांकडून पैसे घेऊन जुगार खेळवताना आढळली. घटनास्थळावरून एक हजार ६० रुपयांचे जुगार साहित्य व रोकड जप्त करण्यात आली.