पालखी सोहळ्यादरम्‍यान ‘पीएमआरडीए’चे सुविधा केंद्र

पिंपरी, ता. २२ : पालखी सोहळ्याच्‍या अनुषंगाने वारकऱ्यांच्‍या सेवेसाठी पुणे महानगर प्रदेश विकास प्राधिकरण (पीएमआरडीए) सज्‍ज झाले आहे. प्रशासनाच्‍यावतीने वारकऱ्यांच्या सोयी, सुरक्षितता आणि स्वागतासाठी खास केंद्र उभारण्यात आले आहे. लोणी काळभोर येथे कदम वस्‍तीजवळ संत तुकाराम महाराज पालखी सोहळ्याचे प्रशासनाकडून स्‍वागत केले जाणार आहे. सासवड, जेजुरी रस्त्‍यादरम्‍यान वडकीनाला हडपसर येथे संत ज्ञानेश्‍वर महाराज पालखी सोहळ्याचे स्‍वागत करण्यात आले. या केंद्राद्वारे निवारा शेड उपलब्ध करून दिले जाणार आहे. शुद्ध पिण्याच्या पाण्याचे वाटप केले जाणार आहे. स्वागतासाठी खास कर्मचारी नियुक्त केले आहे. यासोबत आपत्‍कालीन स्‍थितीत नागरिकांच्‍या सुरक्षेसाठी अग्निशमन दल सज्ज ठेवण्यात आले आहे. बिस्कीट व मास्क वाटपाची व्यवस्था करण्यात आली आहे. तसेच भजन आणि कीर्तनासाठी ध्वनी आणि संगीत व्यवस्था देखील करण्यात आली आहे.