निवारा शेडअभावी प्रवासी रस्त्यावर

सोमाटणे, ता. २५ ः जुना उर्से टोलनाका येथे बसथांबा निवारा शेड नसल्याने पुण्याच्या बाजूकडे जाणाऱ्या प्रवाशांना भर उन्हात वाहनाची प्रतिक्षा करत उभे राहावे लागत आहे. त्यामुळे येथे त्वरित निवारा शेड बसविण्याची प्रवासी मागणी करत आहेत.
द्रुतगती मार्गावरील जुन्या उर्से टोल नाक्याचे स्थलांतर झाल्यानंतर येथे पोलिस व प्रवाशांसाठी असलेल्या निवारा शेडही नवीन टोलनाक्याच्या ठिकाणी हलवण्यात आले. त्यामुळे गेल्या सहा महिन्यांपासून प्रवाशांना उभे राहण्यासाठी निवारा शेड नाही. त्यामुळे पुणे मार्गे सातारा, कराड, कोल्हापूर कर्नाटककडे जाणाऱ्या प्रवाशांना भर उन्हात रस्त्यालगत धोकादायकरीत्या जीव मुठीत घेऊन वाहनाची वाट पाहत रस्त्याच्या कडेला उभे राहावे लागत आहे.
बसथांबा निवाराशेड बसविण्याबाबत गेल्या सहा महिन्यांपासून प्रवासी मागणी करत आहेत. जुन्या उर्से टोलनाका येथून नियमित प्रवास करणाऱ्या प्रवाशांची संख्या अधिक असल्याने प्रशासनाने तातडीने जुना उर्से टोलनाका येथे बसथांबा निवारा शेड बांधावे, अशी मागणी जमीन हक्क परिषेदेचे अध्यक्ष माऊली सोनवणे यांनी केली आहे.