वाचक लिहीतात

वाचक लिहितात
मुकाई चौक ते पुणे स्टेशन
बससेवा सुरू करावी
पीएमपीएमएलने नवीन बीआरटी मार्ग मुकाई चौक ते निगडी सुरू केला. अतिशय स्तुत्य गोष्ट आहे. मुकाई चौक परिसरातील वेगाने वाढणारी वस्ती लक्षात घेता पुणे स्टेशन, स्वारगेट, आळंदी येथे जाण्यासाठी बससेवा सुरू केल्यास निश्चित प्रतिसाद मिळेल. तसेच मुकाई चौकात बसस्टॉपला असलेल्या पायऱ्यांमुळे बसेस बीआरटी स्टॉपला समांतर उभ्या राहत नाहीत. त्यामुळेच ज्येष्ठ, स्त्रिया यांना बसमध्ये चढताना त्रास होतो. यावर तोडगा काढावा.
-श्रीनिवास धोंगडे, शिंदे वस्ती, रावेत.

रस्त्याचे काम त्वरित करावे
पुणे-नाशिक महामार्गावर सिमेंट कॉंक्रीट रस्ता बनवण्याचे काम सुरू आहे. त्यामुळे या महामार्गावर प्रवास करणे अत्यंत जिकिरीचे झाले आहे. विशेषतः आळेफाटा ते नाशिकपर्यंत वाहने धीम्या गतीने पुढे सरकतात. त्यामुळे पुणे-नाशिक प्रवासात वेळ आणि इंधनाचा अपव्यय होतो. यावर उपाययोजना करून वाहतूक सुरळीत करणे आवश्यक आहे. रस्त्याची कामे करताना पर्यायी वाहतूक व्यवस्था सक्षम करून नंतरच कामे करायला पाहिजेत. पुणे-नाशिक, नाशिक-पुणे प्रवास गेल्या अनेक दिवसांपासून त्रासदायक व मनस्ताप देणारा ठरत आहे. यावर लवकरात लवकर उपाय योजना करणे आवश्यक आहे. अन्यथा लोकांचा संयम सुटला तर नक्कीच जनक्षोभ उसळू शकतो.
-सुहास होनराव, वाकड