किमान तापमानात तीन अंशांनी घट

पिंपरी, ता. १ ः गेल्या आठवड्यापासून तापमानाचा पारा घसरल्याने शहरातील गारवा चांगलाच वाढला आहे. गेल्या दोन दिवसांमध्ये किमान तापमानात तीन अंशांनी घट झाली आहे. कमाल तापमानही ३० अंश सेल्सिअसच्या खाली आल्याने दिवसा जाणवणारा उन्हाचा चटका कमी झाला आहे. सोमवारी (ता. १) चिंचवडचे किमान तापमान १५.३ अंश सेल्सिअस एवढे नोंदविण्यात आले. नोव्हेंबरच्या तिसऱ्या आठवड्यात तापमानात वाढ झाल्याने थंडीचा कडाका कमी झाला होता. हवामानात बदल झाल्याने एक डिसेंबरपासून थंडीची लाट येण्याची शक्यता हवामान विभागाने वर्तवली होती. डिसेंबरच्या पहिल्याच दिवशी शहरातील तापमान १५ अंश सेल्सिअसच्या घरात आले आहे. तळेगाव दाभाडे येथे किमान तापमान ९.८ अंश सेल्सिअस एवढे नोंदविण्यात आले.
-----