ताथवडे चौकात छाटलेल्या झाडांच्या फांद्या उचलणार कधी?

पिंपरी, ता. ३ : औंध-रावेत बीआरटी मार्गावरील ताथवडे चौकात पदपथावर पसरलेल्या झाडांच्या फांद्यामुळे नागरिकांना अडचण होत असल्याची दखल घेऊन महापालिकेच्या ‘ड’ प्रभागातील उद्यान विभागाने येथील फांद्या छाटल्या. मात्र, छाटलेल्या फांद्या मागील आठ दिवसापासून याच ठिकाणी पडून असल्याने समस्या वाढली आहे. त्यामुळे व्यावसायिक, पादचारी आणि वाहनचालकांना त्रास सहन करावा लागत आहे.
पिंपरी-चिंचवडच्या पश्चिम भागतील औंध-रावेत बीआरटी मार्ग रहदारीचा मुख्य रस्ता बनला आहे. ताथवडे परिसरात वसाहती वाढल्याने या मार्गावरून सतत वाहनांची ये-जा असते. ताथवडे चौकातील पदपथाचा नागरिक नियमित वापर करतात. त्यांना छाटलेल्या फांद्यामुळे अडथळा होत आहे. रस्त्यालगत पडून असलेल्या फांद्यामुळे पादचारी नव्हे, तर वाहनचालकही त्रस्त झाले आहेत. महापालिकेने छाटणी केली असली तरी फांद्या वेळेत न उचलल्याने नागरिकांमध्ये नाराजी व्यक्त होत आहे.

झाडांच्या फांद्या छाटल्या हे स्वागतार्ह आहे, पण त्या आठ दिवसांपासून पदपथावरच पडून राहिल्याने आम्हाला त्रास सहन करावा लागत आहे. पादचाऱ्यांना आणि वाहनांनाही अडथळा होत आहे. महापालिकेने तत्परतेने फांद्या उचलल्यास नागरिकांसमोरील अडथळा दूर होईल.
- तुकाराम पाटील, नागरिक