आकुर्डीत मोटारीच्या धडकेत पोलिसासह दहा जण जखमी

पिंपरी, ता. ३ : दोन मोटारींच्या किरकोळ अपघाताच्या चौकशीसाठी थांबलेल्या पोलिस आणि कारचालकास अन्य एका मोटार चालकाने धडक दिली. यामध्ये पोलिस शिपायासह आठ ते दहा नागरिक जखमी झाले. सोमवारी (ता. १) हा प्रकार घडला. श्रीराम गंगाधर कुलकर्णी (वय ६३, रा. संभाजीनगर) आणि दिनकर राव माने (वय ५२) यांच्या वाहनांचा किरकोळ अपघात झाला. याबाबत निगडी पोलिसांना कळविण्यात आले. त्यामुळे पोलिस शिपाई देवबा मधुकर थोरात (वय ३५, निगडी पोलिस स्टेशन) घटनास्थळी गेले. ते माहिती घेत असतानाच राहुल रामदास घोडे (वय ३१, रा. चिंचवड) याच्या भरधाव मोटारीने त्यांना आणि घटनास्थळी जमलेल्या इतरांना धडक दिली. याप्रकरणी थोरात यांनी फिर्याद दिली असून निगडी पोलिसांनी आरोपीवर गुन्हा दाखल केला आहे.
.....