‘पिंपरीगाव- चिखली घरकुल मार्गावर मोठ्या बस सोडा’

पिंपरी, ता. ८ ः पुणे महानगर परिवहन महामंडळाकडून (पीएमपीएमएल) पिंपरीगाव ते चिखली घरकुल या मार्गावर मिडी बस सोडण्यात येत आहे. मात्र, प्रवासी संख्येच्या प्रमाणात बस तोकडी पडत आहे. प्रवाशांना दाटीवाटीत प्रवास करावा लागतो. महिला व विद्यार्थिंनीना प्रवासात असुरक्षित वाटते. त्यामुळे या मार्गावर प्रशासनाने मोठी बस सोडावी, अशी मागणी प्रवाशांकडून होत आहे.  
पिंपरी बाजारपेठेत कापड, इलेक्ट्रॉनिक, प्लास्टिक, स्टील, फूल बाजार आणि मोबाईल मार्केट आहे. तसेच अनेक खाद्यपदार्थ विक्रेते आणि इतर स्टॉलधारक आहेत. यामध्ये लाखो कर्मचारी काम करतात. यात महिला कर्मचाऱ्यांची संख्या मोठ्या प्रमाणावर आहे. पिंपरी बाजारपेठेत अनेक होलसेल विक्रेते असल्यामुळे चिखली घरकुल आणि लगतच्या भागातून मोठ्या संख्येने नागरिक खरेदीसाठी येत असतात. शाळा आणि महाविद्यालयात येणाऱ्या विद्यार्थ्यांची संख्याही मोठ्या प्रमाणात आहे. मात्र चिखली घरकुल ते पिंपरी गाव या मार्गावर मिडीबस सोडण्यात येत आहेत. मिडीबसची प्रवासी क्षमता कमी आहे. परिणामी, बस प्रवाशांनी लगेच भरत असल्याने विद्यार्थी, महिला व ज्येष्ठ नागरिकांना उभ्याने प्रवास करावा लागतो.

पिंपरी- भोसरी मार्गावर
बस संख्या वाढवा
पिंपरीगाव ते भोसरी या मार्गावर जाणाऱ्या बसची संख्या अतिशय कमी आहे. दुपारच्या वेळेस तर बस उपलब्ध नसते. त्यामुळे विद्यार्थ्यांना दुपारची शाळा, महाविद्यालय सुटल्यावर घरी जाण्यास उशीर होत आहे. त्यानंतर येणारी बस भरून येत असल्याने बसण्यास जागा मिळत नाही. त्यामुळे या मार्गावर जास्त बस सोडाव्यात अशी मागणी होत आहे.

पीएमपीएमएलने चिखली घरकुल ते पिंपरीगाव मार्गावर मिडी बस सोडल्यामुळे प्रवाशांना नाहक मनस्ताप सहन करावा लागतो. प्रशासनाने या मार्गावर मोठी बस सोडावी.
-महेश पवार, प्रवासी, चिखली

प्रवाशांची मागणी लक्षात घेता मोठी बस सोडण्याबाबत सकारात्मक विचार करण्यात येईल.
-अशोक साबळे, आगार व्यवस्थापक