हाल, मनस्ताप आणि अपघाताचा धोका

पिंपरी, ता. २५ ः पिंपरी चिंचवड शहरातील रस्त्यांवरील खड्ड्यांमुळे वाहनचालकांचे रोजचे हाल सुरू आहेत. पावसाळ्याच्या पार्श्वभूमीवर अनेक मुख्य रस्त्यांवर मोठ्या प्रमाणात खड्डे पडले असून त्यामुळे वाहनांची वाहतूक संथगतीने सुरू आहे. विशेषतः गर्दीच्या वेळात ही स्थिती अधिकच बिकट होत असून नागरिकांना मोठ्या वाहतूक कोंडीचा सामना करावा लागत आहे. खड्ड्यांमुळे अपघातांचा धोका वाढला असून दुचाकीस्वार सर्वाधिक त्रस्त झाले आहेत. खड्ड्यांची दैनंदिन तपासणी करून तातडीने दुरुस्तीची गरज असताना प्रशासन दुर्लक्ष करत आहे. प्रशासनाच्या निष्काळजीपणामुळे नागरिकांच्या सुरक्षेवर प्रश्नचिन्ह निर्माण झाले आहे. लवकरात लवकर हे खड्डे बुजविले गेले नाहीत; तर येत्या काळात स्थिती आणखी बिकट होण्याची शक्यता आहे.