नाशिक पालिकेच्या शिष्टमंडळाची विकास कामांना भेट

पिंपरी, ता. ७ : पिंपरी चिंचवड शहरात विविध विकास कामे उभी राहिली आहेत. नागरी समस्यांवर दीर्घकालीन आणि समतोल उपाय योजना तयार करण्यात आलेल्या विकास कामाचे मॉडेल जाणून घेण्यासाठी रस्ते रचना व एनएमटी प्रकल्पांसाठी तांत्रिक अनुभव, विनिमय व अभ्यास या तीन दिवसीय दौऱ्याअंतर्गत नाशिक महानगरपालिका आयुक्त मनीषा खत्री यांच्या नेतृत्वाखालील अधिकाऱ्यांच्या शिष्टमंडळाने पिंपरी चिंचवड महापालिकेला भेट दिली.
यावेळी अभ्यास बैठकीत महापालिका अतिरिक्त आयुक्त प्रदीप जांभळे पाटील यांनी त्यांचे स्वागत केले. यावेळी नाशिक महानगरपालिका अतिरिक्त आयुक्त करिष्मा नायर, प्रदीप चौधरी, मुख्य अभियंता रवींद्र बागुल, संदेश शिंदे, शहर अभियंता संजय अगरवाल, मुख्य सल्लागार अनिकेत कुलकर्णी, सल्लागार प्राची देशमुख, दीपा मनोगुली, प्रतीक गोद्रे, शिवलीला अरोरा तसेच पिंपरी-चिंचवड महापालिकेचे अधिकारी उपस्थित होते.
या तीन दिवसीय दौऱ्याअंतर्गत पहिल्या दिवशी शहरातील रस्त्यांचे नियोजन, अर्बन स्ट्रीटस्केप, हरित सेतू, ग्रीन बॉण्ड, इंटिग्रेटेड कमांड कंट्रोल सेंटर, रस्ते वाहतूक नियोजन, सर्वसमावेशक रस्ते रचना, बांधकाम नियोजन या विषयांवर आधारित प्रकल्पांची माहिती संगणकीय सादरीकरणाद्वारे दिली. ‘कौशल्यम’, ‘सक्षमा तसेच फॉक्सबेरी संचलित ‘सीटी हब फॉर डेटा कम्युनिकेशन, सीटी ट्रान्सफोर्मेशन ऑफिस, दिव्यांग भवन फाउंडेशन, स्थापत्य, हरित सेतू, ग्रीन बॉण्ड, इंटिग्रेटेड कमांड कंट्रोल सेंटर दी विकास कामांची माहिती त्यांना देण्यात आली.

प्रकल्पांचे संगणकीय सादरीकरण
सस्टेनेबिलिटी सेल, क्लायमेट बजेट, सोशल इम्पॅक्ट बॉण्ड, म्युनिसिपल बॉण्ड, इन्फ्रास्ट्रक्चर प्रकल्प, टीडीआर योजना, स्मार्ट स्ट्रीट, सौर उर्जा वापर, जलनियोजन, सांडपाणी प्रक्रिया, ईआयसीसी सादरीकरण, रोड असेसमेंट मॅनेजमेंट सिस्टम अशा अनेक शहरी उपक्रमांची तसेच शहरात सुरू असलेल्या विकास कामे व प्रकल्पांची माहिती संगणकीय सादरीकरणाद्वारे नाशिक महापालिकेच्या अधिकाऱ्यांना देण्यात आली. त्यांनी अन्य प्रकल्पांची देखील माहिती प्रत्यक्षस्थळी भेट देऊन घेतली.