बॅडमिंटन हॉलची प्रतीक्षाच

राहुल हातोले : सकाळ वृत्तसेवा
पिंपरी, ता. ७ : वाकड परिसरात महापालिकेतर्फे बॅडमिंटन हॉल उभारला जात आहे. पण, त्याचे काम कमालीच्या संथ गतीने सुरू आहे. वर्षभरात सुमारे ६० टक्के काम पूर्ण झाल्याचा दावा प्रशासन करत आहे. तर, उर्वरित कामासाठी आणखी चार महिने लागण्याचा अंदाज व्यक्त करण्यात येत आहे.

सुमारे एक एकरावर हा हॉल उभारला जात आहे. येथे एकूण ८ बॅडमिंटन कोर्ट असतील. तर, पाचशेहून अधिक प्रेक्षक बसू शकतील, इतकी गॅलरी येथे असणार आहे. दरम्यान, हा शहरातील सर्वांत मोठा बॅडमिंटन हॉल असेल असा दावा प्रशासन करत आहे. पण, कामे वेळेत होत नसल्याने खेळाडूंना मात्र आणखी काही काळ प्रतीक्षा करावी लागणार आहे. यामुळे उदयोन्मुख खेळाडू मात्र अन्य ठिकाणी सुविधा शोधत आहेत.

आकडे दृष्टीक्षेपात...
सध्या शहरात कार्यरत बॅडमिंटन हॉल : १६
वाकडे येथील बांधकामाची सद्यस्थिती : ४० टक्के अपूर्ण
पूर्णत्वास लागणारा अंदाजे कालावधी : अंदाजे ४ महिने
अंदाजित खर्च : २० कोटी रूपये

हॉलचे वैशिष्ट्य व रचना :
- प्रशिक्षक आणि खेळाडूंसाठी चेंजिंग रूम
- आकर्षक प्रवेशद्वार आणि स्वच्छतागृह.
- कॉन्फरन्स हॉलची सुविधा
- विस्तृत पार्किंगसह अन्य भौतिक सुविधा

हॉल उभारणीमागील हेतू
या ठिकाणी बॅडमिंटन अकादमी स्थापन होणार आहे. राज्य, राष्ट्रीय आणि आंतरराष्ट्रीय पातळीवरील स्पर्धांसाठी प्रशिक्षण केंद्र.
स्थानिक खेळाडूंना दर्जेदार सुविधा आणि मार्गदर्शन देण्याचा उद्देश. शहराच्या क्रीडा विकासात मोठा टप्पा गाठण्याची संधी.

कामाला उशीर होण्याची कारणे
- वर्क ऑर्डर निघूनही काम सुरू करण्यास उशीर
- कामाचा वेग अपेक्षेपेक्षा संथ, ठेकेदार आणि पुरवठादारांकडून वेळेत काम न होणे.
- प्रशासकीय परवानग्यांतील दिरंगाई.
- कामाच्या ठिकाणच्या उद्घाटनास विलंब

आम्ही गेल्या वर्षभरापासून हा हॉल सुरू होण्याची वाट पाहत आहोत. प्रशिक्षणासाठी घरापासून दूर जावे लागत असल्याने वेळ आणि पैसा वाया जात आहे. त्यामुळे आमच्या परिसरात असणारा हा बॅडमिंटन हॉल सुरू झाल्यास सोयीचे होणार.
- सुमित खंडारे, खेळाडू, वाकड.

काही कारणांमुळे बॅडमिंटन हॉलच्या उभारणीत उशीर झाला आहे. मात्र, येत्या तीन ते चार महिन्यात खेळांडूसाठी हा हॉल उभारला जाणार आहे. शहरातील खेळाडूंसाठी बॅडमिंटन अकादमी उभारणे हा या हॉलचा मुख्य उद्देश आहे.
- मनोज सेठिया, सह शहर अभियंता, पिंपरी-चिंचवड महापालिका.