‘सकाळ एनआयई’ सभासद नोंदणीला उत्स्फूर्त प्रतिसाद

पिंपरी, ता. १० : ‘सकाळ’ माध्यम समूहाच्या ‘सकाळ एनआयई’ (न्यूजपेपर इन एज्युकेशन) या विद्यार्थिप्रिय उपक्रमाला पिंपरी-चिंचवड व परिसरातील शाळांमधून उत्स्फूर्त प्रतिसाद मिळत असून, शाळानिहाय या उपक्रमाची नावनोंदणी सुरू झाली आहे. विद्यार्थ्यांच्या वाचन व लेखन कौशल्याला वाव देण्यासाठी मागील २० वर्षांपासून पुण्यासह महाराष्ट्रभर हा विद्यार्थी उपयुक्त उपक्रम राबविला जात आहे. पाचवी ते दहावीपर्यंतच्या विद्यार्थ्यांसाठी असलेल्या या उपक्रमासाठी २०२५-२६ या शैक्षणिक वर्षासाठी ४०० रुपये शुल्क आहे. मराठी शाळांमध्ये हा उपक्रम करणारे ‘सकाळ’ हे महाराष्ट्रातील एकमेव दैनिक आहे.
पुणे, पिंपरी-चिंचवड, बारामती, ठाणे, कल्याण, डोंबिवली, अहिल्यानगर, सातारा, सोलापूर, कोल्हापूर, औरंगाबाद, नाशिक, जळगाव, नागपूर, अमरावती, यवतमाळ, अकोला अशा विविध ठिकाणी हा उपक्रम होत आहे. ‘सकाळ एनआयई''च्या वतीने वर्षभरात कलाकौशल्य, व्यक्तिमत्त्व विकास, वाचन, विज्ञान व तंत्रज्ञान अशा विषयांवर शाळानिहाय कार्यशाळा, पालक समुपदेशन, शिक्षकांसाठी प्रशिक्षण, स्पर्धा यासह विविध कार्यक्रम आयोजित करण्यात येत असतात. याचबरोबर शैक्षणिक वर्ष दर शुक्रवारी साप्ताहिक स्वरूपातील अंक सभासदांना मिळतील. यात अनेकविध लेख, गंमतकोडी, अवांतर वाचनीय सदरांचा समावेश या अंकात करण्यात आला आहे. तसेच विद्यार्थ्यांना शालोपयोगी भेटवस्तू टिफीन बॉक्स देण्यात येणार आहे.
आपल्या शाळेतील अधिकाधिक विद्यार्थ्यांचा सहभाग या उपक्रमात व्हावा, यासाठी मुख्याध्यापकांनी सहकार्य करावे, असे आवाहन ‘सकाळ एनआयई’च्या वतीने करण्यात आले आहे.

उपक्रमाविषयी...
- सकाळ एनआयई सभासद वार्षिक सभासद नोंदणी शुल्क चारशे रुपये
- शैक्षणिक वर्षात साप्ताहिक स्वरूपातील १२ पानी सकाळ एनआयईचे अंक
- भेटवस्तू टिफीन बॉक्स