उच्चसुरक्षा नंबरप्लेटसाठी शहराबाहेर जाण्याची नामुष्की

पिंपरी, ता. ७ : परिवहन विभागाने उच्चसुरक्षा वाहन क्रमांक पाटी (एचएसआरपी) बसविण्यासाठी १५ ऑगस्ट अंतिम मुदत दिली आहे. त्यानंतर मुदतवाढ देणार नसल्याचे सांगितले आहे. पण, शहरातील बऱ्याच फिटमेंट सेंटरचे ३१ ऑगस्टपर्यंचे बुकिंग फुल्ल झाले आहे. त्यामुळे वाहनचालक शहराबाहेरील फिटमेंट सेंटरचे ‘अपॉइंटमेट’ घेत आहेत. त्यामुळे वेळ आणि पैशांचा भुर्दंड सहन करावा लागत आहे.
परिवहन विभागाने राज्यातील १ एप्रिल २०१९ पुर्वीच्या जुन्या वाहनांना हाय सेक्युरिटी रजिस्ट्रेशन/नंबर प्लेट (एचएसआरपी) बसवून घेणे बंधनकारक केले आहे. राज्यात तीन खासगी कंपन्यांमार्फत ५६ प्रादेशिक आणि उपप्रादेशिक परिवहन विभागात ‘एचएसआरपी’ उपलब्ध करुन दिल्या जात आहे. राज्यभरात एक जानेवारीपासून वाहनांना या नव्या नंबर प्लेट बसवायला सुरुवात झाली आहे. पिंपरी-चिंचवड प्रादेशिक परिवहन विभागात (आरटीओ) ५ जुलैपर्यंत एकूण २४ लाख वाहनांची नोंद आहे. यात १५ लाख ३९ हजार वाहने ही २०१९ पूर्वीची आहेत. यापैकी केवळ २ लाख ८५ हजार वाहन चालकांनी ३० जूनपर्यंत ‘एचएसआरपी’साठी नोंद केली आहे. तर १ लाख ४५ हजार वाहन चालकांनी वाहनांना ‘एचएसआरपी’ बसविली आहे. सहा महिने झाले, तरी अजूनही केवळ दहा टक्के वाहन चालकांनीच ‘एचएसआरपी’ बसविल्या आहेत. वाहनचालकांना ‘एचएसआरपी’ बसविण्यासाठी १५ ऑगस्ट अंतिम तारीख दिली आहे. त्यामुळे वाहनचालक आता नव्या नंबर प्लेटसाठी घाई करत आहेत. पण, वाहनचालकांना विविध स्लॉट उपलब्ध नसणे, वेळेत एचएसआरपी उपलब्ध न होणे यासह विविध समस्यांना तोंड द्यावे लागत आहे.

‘आरटीओ’तील कामांत अडथळे
राज्यभरात ‘एचएसआरपी’ला अल्प प्रतिसाद मिळत आहे. त्यामुळे परिवहन विभागाने ‘एचएसआरपी’ बसविण्याच्या कामामध्ये गती येण्यासाठी विविध उपाययोजना केल्या आहेत. यामध्ये १ एप्रिल २०१९ पूर्वीच्या वाहनांचे हस्तांतरण, नोंदणी प्रमाणपत्रामध्ये पत्ता बदल करणे, वित्त बोजा चढविणे, उतरविणे, दुय्यम नोंदणी प्रमाणपत्र देणे, ना-हरकत प्रमाणपत्र जारी करणे, वाहनांमध्ये बदल करणे आदी कामे ‘एचएसआरपी’ बसविल्याशिवाय १६ जूनपासून करण्यास मनाई केली आहे. त्यामुळे आता ‘एचएसआरपी’ बसविणाऱ्यांची संख्या दिवसेंदिवस वाढत आहे.