शहरातील रस्त्यांची पावसामुळे चाळण

पिंपरी, ता. ६ : पिंपरी चिंचवड शहरात पावसामुळे मुख्य व उपनगर भागातील अंतर्गत रस्त्यांची चाळण झाली आहे. अनेक भागात रस्त्यावर खड्डेच-खड्डे पडले आहेत. मागील दोन दिवस झाले पावसाने उघडीप दिली असून, आता तरी शहरातील खड्डे बुजविणार का? असा सवाल नागरिक उपस्थित करत आहेत. शहरातील १ हजार ६२२ खड्ड्यांपैकी १ हजार ११९ खड्डे बुजविल्याचे प्रशासनाचे दावा केला आहे.
शहरातील पिंपरी, चिंचवड, निगडी, भोसरी, नवी सांगवी, जुनी सांगवी, वाकड, ताथवडे, पुनावळे, थेरगाव, चिखली, आकुर्डी, परिसरातील रस्त्यांवर खड्डे पडले आहेत. गेल्या आठ दिवसात १७८ खड्डे आढळले. आता दोन दिवसांपासून पावसाने उघडीप दिल्याने खड्डे बुजविण्याचे काम अद्याप सुरु केले नाही.
महापालिकेच्या विविध उपनगरातील अनेक रस्त्यावर पावसाळ्यापूर्वी पडलेले खड्डे देखील पालिकेच्या स्थापत्य विभागाकडून बुजविले गेले नाहीत. पावसाळा सुरु होऊन एक महिना झाला आहे. लगेच पिंपरी-चिंचवडकरांना खड्ड्यातूनच प्रवास करावा लागत आहे. भोसरी एमआयडीसी, चिखली, जाधववाडी, देहू रस्ता, चिंचवड, निगडीसह काही भागांतील रस्त्यावर खड्डे आहेत. खड्ड्यांतून सुट्या झालेल्या खडीमुळे दुचाकी घसरून अपघात होत आहेत.