हिंजवडी आयटी पार्कमध्ये वीज पुरवठा खंडित महापारेषणच्या इन्फोसिस-पेगासस अतिउच्चदाब वाहिनीत बिघाड

पिंपरी, ता. ६ : महापारेषण कंपनीच्या २२० केव्ही इन्फोसिस ते २२० केव्ही पेगासस अति उच्चदाब भूमिगत वीज वाहिनीत रविवारी (ता. ६) दोन वाजून दहा मिनिटांच्‍या सुमारास बिघाड झाला. त्‍यामुळे महापारेषणकडून महावितरणच्या एमआयडीसी व आयटी पार्क भागातील ९१ उच्चदाब व सुमारे १२ हजार लघुदाब वीजग्राहकांचा वीजपुरवठा विस्कळित झाला.
महावितरणने दिलेल्‍या माहितीनुसार, महापारेषण कंपनीने नियोजित देखभाल, दुरुस्तीच्या कामासाठी वीजपुरवठा बंद केला होता. मात्र, देखभाल दुरुस्तीचे काम आटोपून वीजपुरवठा सुरु करताना २२० केव्ही इन्फोसिस ते २२० केव्ही पेगासस अति उच्चदाब भूमिगत वीज वाहिनीत मोठा बिघाड झाला. परिणामी महावितरणच्या ग्राहकांना वीजपुरवठा करणाऱ्या २२ केव्हीच्या २५ वाहिन्या, अतिउच्चदाबचे इन्फोसिस व नेक्सट्रा हे दोन ग्राहक अशा ९१ उच्चदाब आणि सुमारे १२ हजार लघुदाब ग्राहकांचा वीजपुरवठा विस्कळित झाला. त्‍यामुळे अनेकांना त्‍याचा नाहक त्रास सहन करावा लागला. पर्यायी मार्गाने वीजपुरवठा सुरळीत करण्यासाठी महावितरणकडून प्रयत्न सुरू होते. ६३ मेगावॅटहून अधिक भार इतरत्र मार्गाने वळविण्याचे काम सुरु असल्याचे महावितरणकडून सांगण्यात आले. हिंजवडी भागातील एमआयडीसी, आयटी पार्क, रायसोनी पार्कचा भाग, डॉहलर कंपनी तसेच विप्रो सर्कलच्या परिसराला याचा फटका बसला आहे. दरम्यान ग्राहकांनी सहकार्य करावे, असे आवाहन महावितरणकडून करण्यात आले.