शिवाजीनगर रेल्वे वसाहतीत टोळक्याची दहशत

पुणे, ता. ७ : शिवाजीनगर रेल्वे स्थानक परिसरातील वसाहतीत एका टोळक्याने कोयत्याचा धाक दाखवून घरात घुसून तोडफोड करत दहशत निर्माण केल्याची घटना घडली. या प्रकरणात शिवाजीनगर पोलिसांनी एका तरुणाला अटक केली असून, त्याच्या नऊ साथीदारांचा शोध घेण्यात येत आहे.
शिवाजीनगर रेल्वे स्थानक परिसरात गुरुवारी (ता. ३) दुपारी महेश नेटके (वय १९, रा. शिवाजीनगर रेल्वे वसाहत) आणि त्याच्या नऊ साथीदारांनी तक्रारदाराच्या घरात घुसून घरातील वस्तूंची तोडफोड केली. यावेळी टोळक्याने कोयते उगारून घरातील लोकांना धमकाविले. आरोपींनी ‘तुमचा मुलगा तौफिकच्या विरोधात गेल्यास त्याला जिवे मारू,’अशी धमकी देत तेथून पसार झाले. याबाबत शिवाजीनगर पोलिस ठाण्यात तक्रार दाखल केली. यावेळी महेश नेटकेसह दहा जणांवर गुन्हा दाखल केला आहे.