‘गाता रहे मेरा दिल’ संगीत मैफलीला प्रेक्षकांचा उत्स्फूर्त प्रतिसाद

पिंपरी, ता. ७ ः ‘छू कर मेरे मन’, ‘कभी कभी मेरे दिल को’, ‘देखा एक ख्वाब तो’, ‘ओ साथी रे’, ‘जाने कैसे कब कहाँ’, ‘निला आसमाँ’, ‘तुम भी चलो’ ‘रिमझिम गिरे सावन’, ‘ती रहेगी बहारे’ अशा एकाहून एक लोकप्रिय गीतांच्या सादरीकरणाला रसिकांनी उत्स्फूर्त प्रतिसाद दिला. निमित्त होते इंडियन म्युझिकल क्लब प्रस्तुत ‘गाता रहे मेरा दिल’ या संगीत मैफिलीच्या २८व्या पर्वाचे.
अमिताभ बच्चन यांच्या गाजलेल्या गाण्यांच्या सादरीकरणाने गायकांनी रसिकांना ठेका धरायला भाग पाडले. निगडी प्राधिकरणातील ग. दि. माडगूळकर नाट्यगृहात रविवारी (ता. ६) आयोजित करण्यात आलेल्या या मैफिलीची संकल्पना अनिल झोपे यांची होती तर निर्मिती राखी झोपे यांची होती. याप्रसंगी हिरामण राठोड, दिलीप काकडे, जयराम शर्मा, किरण वाघेरे यांची प्रमुख उपस्थिती होती.
आषाढी एकादशीनिमित्त अभंग आणि ‘कानडा राजा पंढरीचा...’ या भक्तिरचनेने मैफिलीचा प्रारंभ झाला. अमिताभ बच्चन यांच्यावरील एका भावपूर्ण कवितेचे अभिवाचन करण्यात आले. विजय किल्लेदार, भारती किल्लेदार, अनिल झोपे, श्यामकुमार माने, वैशाली रावळ, मनोज येवले, तरुण कुमार, श्रिया दास, अदिती खटावकर, माधवी पोद्दार, पंकज श्रीवास्तव, राजेंद्र गावडे, दीपक निस्ताने, संदीप पाचारणे, विवेक सोनार, डॉ. गणेश अंबिके या गायकांनी अमिताभ यांच्यावर चित्रित झालेल्या गाण्यांचे अप्रतिम सादरीकरण करीत श्रोत्यांना मंत्रमुग्ध केले. जवळपास प्रत्येक गाण्याला वन्स मोअरची दाद मिळाली. दरम्यान ‘डॉन’ या चित्रपटाच्या शीर्षक गीताच्या सादरीकरणाला श्रोत्यांनी उत्स्फूर्तपणे नाच करून त्याला प्रतिसाद दिला. ‘आदमी जो कहता हैं...’ हे शीळ वाजवून सादर केलेले गीत रसिकांना भावले; ‘मच गया शोर सारी नगरी में...’चा आनंद रसिकांनी शिट्या - टाळ्यांच्या गजरात लुटला. किल्लेदार दांपत्याने सादर केलेले ‘परदेसीयाँ...’ या युगुलस्वरातील गीताने मैफलीत रंग भरले. इंडियन म्युझिकल क्लबच्या पदाधिकाऱ्यांनी संयोजनात परिश्रम घेतले. अमित पांचाळ यांनी निवेदन केले.
---